اختلاف مقاييس الفن في هذا الزمان

اخواني الكرام
بعد التحية والتقدير
اود ان اقوم بطرح موضوع مهم جدا يهم كل انسان غيور على فننا الجليل
لقد ترعرعنا على سيرة فنانين عظام - قدموا وما زالو يقدوما الفن الاصيل والصوت الجميل حتى هذه اللحظة
ولكن
نلاحظ ان مقاييس الفن قد اختلفت تماما
فلقد كان المطرب سابقا يصنف على حسب صوتة
ولكن الان فالمطرب قد اصبح يصنف على حسب (استايلو وشكلو)
والصوت بقى حاجة ثانوية
المهم انو يكون بيعرف يلبس وبيعرف (يركب مكنه فنان)
وانا لاحظت لحاجة غريبة جدا
انو كل واحد من الفنانين الشباب بيكون حولو في مجموعه من الناس بيمجدوه ويهللو ليهو حتى ولو قال (الو) ويحسسوه انو مافي فنان تاني في الدنيا غيرو
الفن ما كده
الفن انك تجبر الناس تعجب بصوتك وبأداءك (وبأخلاقك) - وختو في الاعتبار انو الفنان الزمن ده بقى (قدوة للشباب)
وبقو يقلدوه في كل حاجة
خلاصة الموضوع
اختلفت شخصية الفنانين - وبقو اشبة بالعارضين - بيعتمدو على مظهرهم (والعربية والسواق) وووووو
حقو نقعد مع نفسنا شوية كمستمعين ونحاول نرجع مقاييس الفن الأصيل
ولا انتو رايكم شنو؟
رايك بيهمني يا ديكور
ولكم التحية

السلـ عاشقة ـطان كتب:

اهلا بيك ياSUDAMIX بينتنا
عجبتنى جدا طريقة طرحك للموضوع
وانا راى من رايك انو فى بعض من الناس بيكون حبهم لى الفنان بى الصوره دى
بى الذات البنات امكن اول حاجه تجزبهم لى الفنان شكلو واستايلو وده ماغلط لانها حاجه طبيعيه فى النفس البشريه لكن فى تاني حاجات اهم مابتقف ع الشكل والاستايل
وانا بشوف اول شئ بيجزبنى لى الفنان صوتو لانه المحدد الرسمى لى ابداعه خصوصا اذا كنته انا مستمعه اليه لى اول مره
فى المرحله التانيه بيجى احساسه بى البقدمو وده اهم شئ لانو الفنان رساله واكيد مارح ينجح لو ماقدر يوصلها بى صوره سليمه اما حكاية الاعجاب بشخصه فادى مابتكون لى اى فنان فقط للفنان البيجبرك تحترم رايه وقراراته وتقدره اما بى اعتبار انو يكون قدوه فادى حاجه كويسه لانو مادام انته ختيت زول يكون قدوه ليك فاكيد فيها اشياء كتيره ساره وايجابيه بى الذات لانو عامتا ماالمشاهير بيبرزو ايجابيتهم.....
اصابع ايديك ماواحده
اسفه ع الاطاله
وشكرا ليك

عاشقة السلطان
اهلا بيك يا غالية
والحمد لله انو طريقة طرح الموضوع عجبتك
وفعلا اساس الفنان صوته ومدى تطريبة
وبالفعل تشرفت جدا بردك القيم
تقبلي ارق التحايا

ودالمهدي كتب:

اول حاجه أحب أرحب بيكـ ترحيب خاص أخونا sudamix
أنا معـــاكـ فــي حاجات و بختلف معـــاكـ في حاجــــــــــــات تــــــانيه
بتفق معاكـ في الناس بدت تهتم بالمظهر بتاع الفنان لأنو بكون واجهه لي بيت العرس
أو الأستديو أو التــــــــــــــــــــخاريج

بختـــلف مـــعاكـ من ناحـــيه ءانـــو الفنان بعظمـــوه القريبين ليه ءان صحه تعبيري
الفنان البكـــون حواليه ناس معـــناه ده فـــنان في رأي ناجح ,, ليه
لأنو قدر بي فنو يحتويهم جمبو وعن طريقمم احتمال 90% ينجح نجاح باهر جدا
أنا ما عايز أطيل لاكن موضوعكـ بي قيمه ءاسمكـ موضوع قيم جدا
اتمني نستفيد منك و نقدر نفيدكـ

تسلم كتير يا ود المهدي
طيب نقطة نظام
يعني الفنان اللي ماعندو اصحاب معناها صوتو ما سمح؟
عن طريقهم احتمال 90% ينجح نجاح باهر؟
طيب من غير الناس اللي بكونو جنبو وبيمجدوه معناها ما حينجح؟
في انتظار التوضيح اخي الكريم
وتسلم كتير على الترحيب
وان شاء الله اقدر ازيد حاجة في المنتدى الجميل ده

ودالمهدي كتب:

معليش في حاجه خطرت بالي أو ممكن تقول سؤال و ياريت ترد علي سؤالي

ءانته بي كلامك الانا قريتو ده كلو قاصد منو من الفنانين (( طه سليمان )) صاح

يا ريت ترد علي بي صراحه

بدووووون تعليق
يعني مافي فنان شاب غير طه؟
وليه بس حددت طه؟؟؟؟؟؟
!!!!!!!!!!!!!!!!!

محمد ديكور كتب:

سلامى ، وتحياتى ، واحترامى كاملا شاملا

الحبيب جدا الى القلبSUDAMIX هذا الموضوع اعتبره من اهم المواضيع التى فتحت فى هذا المنتدى ، بل فى كل الساحات المهتمة بهذا الجانب ، واعتبر ان الحديث عنه من المفترض ان يدخل فى اطار الشفافية لكى تظهر الحقائق كاملة حتى نصل للفائدة المرجوة .
طرح الموضوع بهذه الصورة به من الوضوح مايمكن المتداخل من ابداء رايه بصراحة شديدة وبدون تجميل و(تزييف) .
كلنا مقتنع تماما ان (الفنانين القدام) قد ابدعوا ايما ابداع واثروا الساحة الفنية بغناء (خالد) اجبر الاجيال المتعاقبة على ترديده لان به (كم) هائل من الشجن ، شعرا ولحنا واداءا .
لذلك انا اتفق معك تماما فى هذا الجانب ، وبل واضيف ان له سحرا (لايضاهى) ، جعلة (مسيطرا) على الساحة الى الآن ، ولكن .....
اين الجديد اذا اعتبرنا ان للغناء السودانى مراحل طبيعية تبدا من دخول (الحضارة الاسلامية) وطريقة ترغيب السكان المحليين انذاك بالدفوف الايقاعية وهى الطريقة التى انتجت لنا (المدائح النبوية) والتى اهتمت بمدح المصطفى صلى الله عليه وسلم ، ثم تحولت بعد ذلك واستخدمها (الفنانين الاوآئل) فى طرح اغنياتهم بمصاحبة آلة (الرق) ومن هنا بدأت مرحلة (الحقيبة) فابدع كرومه وتجلى سرور، ويالها من مرحلة كانت ولاتزال تؤثر على وجدانياتنا جميعا الا من ابى .
تطورت الاغنية السودانية بعد ذلك بتطور الغناء (اقليميا) وسافر بعض من الفنانون السودانيون الى (مصر) ونهلو من علم الموسيقى ورجعوا بصحبة الآلآت الموسيقية (الشلو ، والكاونتر باص ، والفايولين ، والبيانو ، والقانون و.....و......الخ) وبدأ عهد (الغناء الحديث) ، عهد الكاشف ومن بعده العاقب محمد الحسن ورفقاء دربه من الذين تزودوا بالموسيقى كعلم يمكن كتابته وقراءته فابدعو وتغلبوا فى احايين كثيرة حتى على من سبقوهم !! .
ثم ماذا بعد ذلك ؟!!
هو السؤال الذى اختلف معك فى اجابته ، لان من اتى بعد ذلك من الفنانين (جيل الوسط) وجد نفسه مواجها بالقديم و(التطورات الموسيقية الاقليمية) فمنهم من ابدع ومنهم من لم يستطع واخذ يدور فى فلك (الآخرين) وهذه حقيقة يجب التسليم بها من واقع الحال .
هذا الجيل ياعزيزى SUDAMIX لم يعبد الطريق للآتين بعده مع العلم ان (المنظومة) اصبحت اكثر علمية بقيام الاتحادات والمؤسسات المنوط بها تسيير العمل الفنى ولكن كانت اهتماماتهم اقل بكثير من طموحات الجيل الحالى ولم نشهد تفعيلا( للدور الحقيقى) لهذه المؤسسات وزد على ذلك تعاقب الحكومات وفرض سياستها على المجتمع وفى اعتقادى ان ضعف (جيل الوسط) قد ساعد على التقليل من شان الفن والفنانين .
اما بخصوص (الملبس والنيولوك) فهو الشئ الوحيد الذى ورثناه كجيل منهم والدليل على ذلك (التسريحات المشهورة والمسميات ) .
تنبه : لا اعنى بضعف (جيل الوسط) ضعف الاعمال الغنائية بل اعنى ضعف الاهتمام ببناء قوى وارضية صلبة للاجيال القادمة .
لذلك دعنا لانندهش لولوج بعض (المرتزقة) للمجال الفنى .
توضيح : من الاشياء الجميلة الاهتمام بالمظهر بالنسبة للفنانين ولاضير فى ذلك بل العكس . اعنى بذلك (النيولوك وماشابه) ، فهو من الاشياء الضرورية للفنان فى هذا العصر (بسكون الصاد) .
اما بخصوص معية الفنان : هو شئ طبيعى للغاية ولكن يختلف الفنان بإختلاف معيته !!!!!!! .
نقطة مهمة : بخصوص شكل ومضمون الاغانى (الخفيف والتقيل) انا من غير (المستغربين) فالغناء الجاد منذ البداية المذكورة آنفا ياتى مصحوبا بالغناء (الخفيف) وفى اعتقادى لو وجد من قبلنا هذا التطور (التكنولوجى) وانتشار (السبل الاعلامية) لكان الامر طبيعيا .
الاغانى (الخفيفة) فى العهود السابقة والتى وصلت الى مسامعنا عبر (السبل البسيطة) المتاحة شاهد عيان على حديثى واتمنى لو بحثنا قليلا عنها حتى ندرك (الحقيقة) .

عزيزى SUDAMIX عذرا للاطالة واتمنى ان تكون مشاركتى مجدية وانا على استعداد للمشاركة مرة اخرى ان فاتنى شئ .

لك الود (ممزوجا بالمحبة)

ديكور الغالي
قيثارة الكلمة الجميلة
كيفك وكيف اخبارك
ردك اكتر من رائع وبالفعل دي الردود اللي بتشجع الاعضاء يكتبو ويشاركو
وكلامك درر اتمنى انو الناس تفهمو
ولك التحية يا استاذ