.:: منتديات محمد ديكور وطه سليمان ::.



 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 مكتبة عبدالله حمد ودشورانى

اذهب الى الأسفل 
كاتب الموضوعرسالة
محمدحمزة
عضو مميز
عضو مميز


عدد المساهمات : 141
تاريخ التسجيل : 03/08/2009

مُساهمةموضوع: مكتبة عبدالله حمد ودشورانى   الإثنين 17 أغسطس 2009, 4:29 pm

سيرة ذاتية
الإسم : عبد الله حمد شوراني
اللقب : ود شوراني
المولد والنشأة : ولد بقرية أم شديدة بالبطانة(70 كيلو متر جنوب شرق الدامر) في العام 1923م تقريباً
المهنة : شيخ قبيلة
القبيلة : من قبيلة الكواهلة فرع المرغماب
الحالة الإجتماعية : متزوج وله زوجتان الأولى من المغاربة والثانية من المرغماب وله بنتان وولد وهو الآن شيخ قبيلة المرغماب
- عاش ود شوراني محبوباً بين الناس ومشهوراً بشعره الرصين ويشار إليه بالبنان عندما يذكر الشعر القومي بالسودان .
- توفي بمستشفى الدامر في 14/1/1989م
- صدر له ديوان واحد يحمل إسمه في عام 2000.

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمدحمزة
عضو مميز
عضو مميز


عدد المساهمات : 141
تاريخ التسجيل : 03/08/2009

مُساهمةموضوع: رد: مكتبة عبدالله حمد ودشورانى   الإثنين 17 أغسطس 2009, 4:32 pm

الغــــــــــــــزل



(1)



نومي الليلة يا أبو جنح إشارات عدمو


أمسو ربيطة عُربان أم خدود الهدمو


ماخد البلجة حالي الفِطرة مبتور قدمو


جاهلاً سدرو بي عقود الفلايت ردمو



(2)



قلبي الكان تايب وخاشعاً متـطوِّع


أمسى الليلة دافر مركبو ومــتنوع


الخلاني فاقد الفوق وسادتو مكوِّع


تاتاي الفلو وقدم الحمام مـــا ببوِّع





(3)



يا بدوي البنوح عدد الليالي مـــــــــــريضو


أسمع من جنا الصيد والصهل عنــــــد سيدو


عاشق البي الحبوب الغالية مرصوص جيدو


دهبو اللابسو ما خلا َّلو فجة يزيـــــــــــــــدو



(4)



أنا يا أب (تِلة) ساجعة العشا البتقوقــــــــي


قـُتلها أكـُرسي نومي وضِيفي سهرك فوقي


من بُريّب وأريل وأب طعم معشوقــــــــي


صديت تاني لي مضغ الغـُنا وحيروقـــــي





(5)



شبه الفوق كرايد الريل عِلن شارفات


شفتو الليلة في العند الظهور عاطفات


السادة المسرَّح شال قلوبنا وفــــــــات


أب توباً منوَّع زولو أضمن مـــــــــات



(6)



بين الحلة والخلوة وبنٍيْة الشيخ


شاهد ظبية الرَّدن مالق الفــيخ


الهسرروا نحيِّر كبده مو ردِّيخ


الحركة القليلة تجبلها المـــليـَِّخ



(7)



تيلاد الولي الفاز بالكرم تاريخـــــــــــو


غفـَّرني النجم ظاهرو وخفـّي ومــريخو


منها قام بنا البي البوهية مضروب سيخو


عندها شارد الكيعان بخيل تنويخـــــــــو



(Cool



جاهل ظرفي لكن برضي عارف ظرفو


وقلبي وقلبو ما بين الحصل يعترفـــــــو


ريدي أنا ليهو لو دَرَسو وقراهو وعرفو


زي شيك البنوك في أي لحظة يصـُرفـو



(9)



الريد إن كِتر لا بد يضيِّع سيــــــــدو


وإن نصحوه ما اظن النصيحة تفيدو


الزول التريدو لو سالَمَك بي إيــــــدو


تبقى شربت من لبن الحليب مــو نيدو





(10)



ديسك ريش نعام كاجا الجفل بي شروقــو


ووجهك خدو ما اسمح جرت الموس فـوقو


ريقك جرعة العسل البيشرق ضوقــــــــــو


بهدلتيني مختار الله في مخلوقــــــــــــــــــو



(11)



جاهلاً همو ظروفو وما عرفت قــــــبايلو


لافح قرمصيص لابس تياب النــــــــايلو


شفتو الديسو لاعند الفنايد طــــــــــــايلو

بكرو يحن ومطرو تصب ومادّة رحايلو

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمدحمزة
عضو مميز
عضو مميز


عدد المساهمات : 141
تاريخ التسجيل : 03/08/2009

مُساهمةموضوع: رد: مكتبة عبدالله حمد ودشورانى   الإثنين 17 أغسطس 2009, 4:34 pm

الوصف
نرى
في شعر ود شوراني نماذج مختلفة لها طعم خاص ، وأورد لكم هنا وصفه (لسيرة
زواج) أبناء ناظر البشاريين أحمد كرار أحمد في فرح أبنائه محمود والضو وهم
يتحركون من منطقة يعلوك معقل نظارة البشاريين بنهر عطبرة قاصدين منطقة
حلايب بالبحر الأحمر والتي يوجد بها الشيخ حامد كرار شيخ خط حلايب وهو عم
العريسين المذكورين آنفاً ومعهم الشاعر ود شوراني ،،، وقال ود شوراني
واصفاً الزواج من أوله وحتى نهاية الرحلة :

قبال الثلاثاء البوشا سيدو يواعــــــــد
سبعة أيام تمام الديش مديِّم قاعــــــــد
خيراً مستمر واصل القريب والباعـد
ضبـِح وخسارة كميات والله يســــاعد


أبناء الريِّس بوشن قبايل جـــــــــــــنـُّو
تلات جزرات وجخسين بركة ما عدَّنو
لامن تاني بقرة وديف سريع لحقــــــنو
حتى جديد قضى وكـُفـَّايو قعدو يهـــــنو


إبلو الراجي جيب رسنك نسِل تحريرة دايماً في المجالس ليها ذكرة وســـــيرة
زينتو الساها يوم البوش كبيرة صغيرة
أخدن فالا ما خلَّن تشيلو مـــــــــــغيرة
البوش يومو فات والديش وجود ما إتحوَّل
فوق لازم التريد الضيفو مابقول طـــــــوَّل
الفضلي العليهو بخالة مـــــــــــــــــا بتتأوَّل
لي (زمل) الضيوف مخزن ملاهــــو شووَّل
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمدحمزة
عضو مميز
عضو مميز


عدد المساهمات : 141
تاريخ التسجيل : 03/08/2009

مُساهمةموضوع: رد: مكتبة عبدالله حمد ودشورانى   الإثنين 17 أغسطس 2009, 4:36 pm

<<شووّل = جمع شوال>>


وريث كرم الجدود الفضلو ماشي عـــديل
يزيد في الطاقة مهما الديش يشوفو طويل
قال للراح يوزِّع للعلوق ما تكيـــــــــــــل
يات من سيد جمل يدخل براهــــــــو يشيل


المكرمتو زي عين البحر متنابعـــــــــــة
خلاوي مفرَّشو لي ضيوفو ساقية وشابعة
إتخـَتـْرينا الكرامة وسرنا يوم السابعـــــة
بي تكسي ولواري الدامر المتتابعـــــــــة


جينا على الفريع بي فوق وحالة تكيـِّف
إستنونا ناساً موقِفـُن مــــــــــو ضِعيـِّف
فوق أبناء الريـِّس الشـَعبـَهـُن مــــتقيـِّف
كنت ببالغ إلا غـُناي واردو قصــــــيـِّف


خطيبُن قال حقايق وزدنا منو كــــيوف
وعملوا الحفلة لامن عينا دايرة تـشوف
حكاماتنا عندهن إمتياز مــــــــــعروف
جـِنينا سلاحو يفرِّغ وتاني يملا ظروف


بعد قفلوا النشايد وحفلة العــــصرية
قدَّموا ودعــــونا الربطتـُن مـِي نيـَّة
سرنا علي المحطة معانا كم عربية
عمران التذاكر قطـَّعن كــــــــــمية


العـُرسا العزاز وملوك وممتازيــــن
ليهم وللجماعة مبدرين حاجــــــزين
النقارة تلبخ والجـِنين هـــــــــــازِّين
كماسـِرة َ القطر من شوفنا منحظين


عهد الساعة واحدة جينا في بورتسودان
خبرنا سبقنا عند مركزنا والســــــــكان
جنيات أتبرا السايرين مع العرســــــان
سيـَّافـُـــــــــــن مفضفض وقلبهم تغيان


واقف في المحــــــطة أبـَشـَر راجينه
بي عربات فواضــي وتكسي متلقينه
الأبواتو فــــــــــــــرساناً قلوبا متينه
تلفونو البـِكالم هو السبب في مجينا


عشرة أيام تمام مــــــــن الشروق للغيبه
فوق جرِّق خســــــــارة ً بقدِّر الدعكيبه
نفـَّز وَحـْلـَة الوكـــــــرة التجيب الشيبه
كاسية وعاطية إيدو الديمة وافر جيبه


سلالاب فيها أخدنا مقامنا راحة وكيف
الواندوق يدُق والعرضــة درقة وسيف
البحر البيضرب موجـــــــو فوق القيف
وافرة مكارمو للجار والعشير والضيف


قبـُل أهل اللواري يقـــــــولو قومو نسير
شطـَّة وكـِبدة فطــــرتنا وشرابنا عصير
بوش أبناء الريـِّس اللــّقاسية لينا مصير
قالو الموية قدام فــــــــــــــي سلاله أسير


أسياد الحديد لي قيامنا ضربو البـــــوري
من سلالاب طلعنا اللوري طارد اللوري
يا أرض الجبال الثابتة مــــــــــا بتفوري
إتكيـَّفت منك ونازلك دستـــــــــــــــوري


شاقين أربعات شاحنين لواري جماعـــــــة
مشحونات زهاباً صنفو أعز بضــــــــــاعة
ركــَّازة الضـُعاف وكتين سنسن ومــــجاعة
في الزمن الطويل ما ضاق قفل نص ساعة


أسياد اللواري السفرونا عـــــــــــــجاله
شالو الموية في لحظة وعقبنا ســـــلاله
بوش أبناء الريـِّس اليـًد َّهـُـــــــم بهـَّاله
نشرات الصحف قايلة فـــــــوقنا مقالة


عمران للسفر عزَّل لواري تمــــام
(محمد قول) وقفنا عليهو قلنا سلام
مافي تلات دقايق منو قالو قـــــيام
اللاسلكي مدَّ خبرنا للقـــــــــــــدام


بعد جينا (أم أروب) القليل مخلوقــو
ناظر العامـَّة قال أحسن تنزلو تروقو
الفضلي البينفـِق لي رباعتو حقوقـــو
لدو الكان بعيد خالص ضـِمنا لحوقو


رُقنا وقمنا تاني علي لواري نـُصاح
أولو وآخرو إنشاء الله كلو أفــــــراح
في يوم الخميسر أبدر علي المرواح
جينا حلايب الفيها أب نباياً فـــــــاح


لاقانا الخبير عارف الــــــــــــــدروب لفـَّابو
جابنا علي السخي الموجود وبـِرضي خرابو
المن تبَّ مـــــــــــــــــــــــا سوالو ميزاً دابو
واقفين لينا بي خـُفـَراً وحمـــــــــــــد أورابو


عشرين ين يوم ضبايح وإحتفال وخسارة
فوق الجودو مو بـِقريط قليل وبصــــارة
فارس شـَبـْكـَة الخيل البيلوي عُــصـــارة
رايو بـِلاوي خـُرطاً ترجموها نــــصارة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمد ديكور
المدير العام
المدير العام
avatar

عدد المساهمات : 379
تاريخ التسجيل : 03/08/2009

مُساهمةموضوع: رد: مكتبة عبدالله حمد ودشورانى   الثلاثاء 18 أغسطس 2009, 9:18 pm

سلامى ، وتحياتى ، واحترامى كاملا شاملا

قمة الامتياز والايامات دى شايف منافسات كبيرة جدا لكن بينى بينك انت خطير ياود حمزة لانك مشيت على شعراء المربعات او المجادعات وديل كمان عالم براااااه وماتنسى معاك بالله ناس (ود الشلهمة) وود الرضى وعكير الدامر وحمدان (البطانية).

والله الواحد ماعارف يقول ليك شنو لكن .................
شكرا



تخريمة : نادو لينا عاشقة بى جاى نشوفه حتفهم حاجة Rolling Eyes

لك الود (مربعا)
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://dicor.mam9.com
محمدحمزة
عضو مميز
عضو مميز


عدد المساهمات : 141
تاريخ التسجيل : 03/08/2009

مُساهمةموضوع: رد: مكتبة عبدالله حمد ودشورانى   الأربعاء 19 أغسطس 2009, 4:01 am

تسلم تسلم يامدير وزى مابقولوا الغريق قدام
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ودالمهدي
عضو نشيط
عضو نشيط
avatar

عدد المساهمات : 71
تاريخ التسجيل : 03/08/2009
العمر : 30

مُساهمةموضوع: رد: مكتبة عبدالله حمد ودشورانى   الخميس 27 أغسطس 2009, 5:52 am

يا ود حمزه شايف اهلي ناس الدامر عاجبنك شديد
لاكن انته والله مشاءالله عليك زول اضانك نضيفه
وبسمع وبتسمعنا معاك حاجات راقيه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ba6a79
مشرف
مشرف
avatar

عدد المساهمات : 132
تاريخ التسجيل : 05/08/2009

مُساهمةموضوع: رد: مكتبة عبدالله حمد ودشورانى   الخميس 27 أغسطس 2009, 7:59 am

ياخ زاتو ما عارفه اقول شنو

بالجد ما عارفه اعبر كيف

بس الله يحفظك يا ود حمزه يا عجيييييب انت

و مستنيين الغريق

و لى قدام
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمدحمزة
عضو مميز
عضو مميز


عدد المساهمات : 141
تاريخ التسجيل : 03/08/2009

مُساهمةموضوع: رد: مكتبة عبدالله حمد ودشورانى   الخميس 27 أغسطس 2009, 8:49 am

ودالمهدى
بطة
ويا ودالمهدى اهلك كتابين عشان كدا نحنا معاهم طوالى
ويا بطة كاتقولى حاجة لحدى ما اجيب ليك الغريق
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
مكتبة عبدالله حمد ودشورانى
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
.:: منتديات محمد ديكور وطه سليمان ::. :: °•.ღ.•°منتديات الاداب والفنون°•.ღ.•° :: °•.ღ.•°منتدي للشعر°•.ღ.•°-
انتقل الى: