صـــــاحـــــبـــــي الـــــوحـــــيـــــد

مشرف عدد المساهمات : 357 تاريخ التسجيل : 05/08/2009

ما لقيتى غير صاحبي الوحيد
كان تمشي إنتي مع السراب
تبقى الخيانه بعيد بعيد
وتسيبي لي صاحب العمر
أشكيلو هم قلبي البريد

ما أصلو أسباب قربو منك .. كنته بحكي ليهو عنك
بي قليب مليان محبة همو كلو رضاك وحنك
لا بخون في يوم صديقو ... ولا حبيبو
تـــــاني عاد كيفن بريد

أنا شفته ريدكم في العيون
والريده ما بتحتاج لبيب
لكني كذبت الظنون
وإخترت لي روحي النحيب
والشكوى من قل الوفا .. والقسوة من حظي العنيد

يبقى هو وتبقي إنتي والمقادير والنصيب
أبقه رضيان بيها قسمه والجايه من الله بتصيب
إلا إنتي أبقي راضيه وكل يوم أسأل وعيد
ما لقيتي غير صاحبي الوحيد...؟؟

مشرف عدد المساهمات : 132 تاريخ التسجيل : 05/08/2009

نفسى اعرف الزول دا عمل شنو؟؟؟؟

مشرف عدد المساهمات : 357 تاريخ التسجيل : 05/08/2009

تعال ياودحمزه احكى لينا القصه
بس والله تقطع القلب الغنيه دى بى الذات لمن يغنيها السلطان وانته تكون عارف القصه
بقه علينا كلمات .. انين .. وحدث الله كريم علينا
والله انا مرات لمن اسمعها لمن ادمع لكن من ما قالو عرس خلصنا
طبعا اى زول ممكن يجى يحكى لينا
لكن انا اخترته محمد عشان هو خلى نقول الناشرها

سلامات على كل الروائع
وسلامات يا عاشقه مليون تحيه

استأزنك عزيزنا ديكور فى انتحال شخصيه المحلل ودعنى اجرب عسي اخيب او اصيب

(ما لقيتى غير صاحبي الوحيد
كان تمشي إنتي مع السراب
تبقي الخيانه بعيد بعيد)

التفسير الاول : او الخيال الاول (دعنا نعطى هاؤلا الاصدقاء اسماء اولا الشاكى ونسميه (ص) صديقه (د) الفتاة نسميها (ق)

يتحسر (ص) ويشكو ويعاتب (ق) بقوله اولم تجدى غير صديقى لتبعديه عنى اولم تجدى غير (د) اتيتى فجاءه من غير استئزان واخذت صديقى منى والذى اعتبره قد خاننى بحبه لك بمعنى خان محبتنا انا وهو واقحم ثالثا فى الامر فى تلك لصداقه المتخمه حبا والتى لا حدود لها .. فعاتب (ص) صديقه ( د) فى اخر المقطع عتابا متواريا خلف كلمه الخيانه بعيد بعيد .

انا فهمتها كده يا اخوانا ومعليش كلام ديكور سلاح زو حدين (ههههههه)

التفسير الثانى : ان (ق) قد احب الفتاة حبا جما وعندما اكتش انها قد وقعت فى حب (د) غضب وثار ولكن لا عزر له فهو لم يصرح يوما بحبه ل (ق) وانما كان يتحدث عنها مع صديقه ( د) يتمنى ان تكون هى من وحى الخيال فقط حتى لا يوضع فى هذا الموضع خانه صديقه وهو لا يعلم انه يخون صديقا او اخا وانما من خلال حديث رسم لنفسه بيتا وحلما وسعى لتحقيقه وحققه وهنا نتبين ضعف ( ص) حيث كان صديقه اسبق للبوح بما تكنه مشاعره ونعزر الفتاة ( ق) فهى ايضا لا تدرى ان (ص) يحمل لها شي فى نفسه وانما هى قد صادفت ( د) واحبته

انا برضو فهمتها كده يا اخوانا معليش زى ما شرحت

يتبع ....

مشرف عدد المساهمات : 357 تاريخ التسجيل : 05/08/2009

الله يسلمك ويخليك يامهيار
نورت البوست
حقيقه عجبنى تحليلك
لكن الاصاب الاول وده مالانى عارفه القصه
ده لانو استاذنا ديكور رده عليك وورنا بقية القص فى المقطع البعدو

ما أصلو أسباب قربو منك .. كنته بحكي ليهو عنك
بي قليب مليان محبة همو كلو رضاك وحنك
لا بخون في يوم صديقو ... والبخون في يوم صديقو
تـــــاني عاد كيفن بريد

وده لانو بوضح انو (ص) عرف (خ) الفتاه من (د)
فهو اول واحد يعرفها وبما انو بيحكى ليها عنها معناها انو والردى فى علاقه بيناتهم
وطبعا (د) ماكان بيتصور انو صديقه يخونوه والسبب التانى انو موامن ع (ف) بما انو فى علاقه بيناتم
طبعا انا المقطع ده بحبو شديد وبعتبرو الاساس لانو فيهو كل الماساه اى انه هو "المعتدى عليه" هو السبب فى الحصل ليهو طبعا هو اكيد ماالسبب لكن بحسسنا البيت ده بى انو هو كانو بلوم نفسه
بتمنى تكونو فهمتونى
اضافه والمقطع الاول ممكن كمان بتترجم ع اساسا انو (د) ماممانع انو البت تخونو لكن مامعا صاحبو "الوحيد" وده بثبتو السؤال من غير منتظر اجابه
ده غير انو بتحس علامة تعجب فى السؤال وده اكيد سببو عدم التصديق
ارجو انك ماتواخذنى يامهيار فى انتظارك وديكورنا
وتفاعل باقى الاعضاء

تحياتى عاشقه

دقيقه ما تمشي بعيد

اولا الخلاك انك تفرضي انو (ص ) بيعرف او على علاقه مع الفتاه (ق) شنو انا افترضت انو هو حكى لصاحبو عنها
عن جمالها عن الطريقه البتشوفها عيون ( ص) ليها

ولاحظى بى قليب مليان محبه يعنى اللحظه ديك حيوصف كل ما يتجمل له فى الخيال
يعنى بالواضح كده هو شايفه من بعيد ما شرط يكون على علاقه معاها وتحصل الخيانه
ونرجع للسؤال الاهم

من الزى خان من ؟؟

هل خان الصديق (د) صديقه (ص) صاحب الروايا
ام
هل خانت (الفتاة (ق ) الحبيب (ص) مع صديقه (د)
ام
هل خان (ص) نفسه عندما لم يبوح ويصرح وصعب عليه البوح بعد ان احبها صديقه فاعتبرها خيانه ايضا

ولك كل ودى

ولى قدام

سلامى ، وتحياتى ، واحترامى كاملا شاملا

طبعا الماعادى فى (البوست) طريقة الطرح وحقيقى عجبتنى شديييييييييييييد لانو بتفتح آفآق للخيال والرؤى .
يعنى بتناقش النص بصورة (حقيقية) مرة وصورة (خيالية) مرة اخرى .
هذه الطريقة تهتم بالتفاصيل الدقيقة جدا ولاتترك شارده او وارده الا وتتكلم عنها . حتى المعانى وما يصاحبها من تاويلات .

المهم فى الموضوع هو معايشة الاغنية حتى نستطيع تكوين فكرة صحيحة عن المراد توصيله من خلال استخدام الالفاظ والمفردات .

اعتبروها بداية مداخلة
وبمشى وبجى لانو عندى راى فى تفاسير الاخ العزيز والفنان (مهيار)

وعندى راى برضو فى كلام عاشقة السلطان
لكن طبعا راى الاغنية وااااااااااااضح وهو الحاق اللوم بها ............ لانها السبب الرئيسى فى (ذلك)

يغنى المغنى وكل على هواه

لى قدام
لكم الود(صديقا)

مشرف عدد المساهمات : 357 تاريخ التسجيل : 05/08/2009

التحيات لله
طيب يامهيار
الخالنى القول كده
لانو سالها هى معناها ذى ماقال ديكور السبب منها
ما لقيتي غير صاحبي الوحيد...؟؟
لو كان حكى لى صاحبو عنها ومن غير مايكون يبناتم علاقه
وصاحبو خانو مشى حبها واعترف ليها هو عارف انو صاحبو بريدها بكون خاتى اللوم عليهو هو بمعنى انو السؤال المعاتب رح كان يكون موجه ليهو هو عشان البت كده حتكون مافى الصوره
واذا اتمعنته فى القصيده تانى بتلقى انو هو فى نصهوم بيقى مثلا
أنا شفته ريدكم في العيون
تانى شئ هو مافارقه معاهو انها تخونو لانو قال ليها
كان تمشي إنتي مع السراب
تبقى الخيانه بعيد بعيد
بس مامعا صديق عمرو
وله رائك شنو...؟؟

مشرف عدد المساهمات : 357 تاريخ التسجيل : 05/08/2009

وانا فى انتظارك ياديكور

مشرف عدد المساهمات : 132 تاريخ التسجيل : 05/08/2009

موضوع عجييييب

فى رايى المتواضع انو اذا البت ما كانت حبيبته او على الاقل ماعارفه بى مشاعرو ما كانت بتكون خيانه

و زى ما قال ( ديكور ) انو الاغنيه واااااضحه و هى القاء اللوم عليها يعنى هى كانت اكيييييد عارفه ,, و لو كان غير كده معناها الزول دا ما عندو اييييييييى منطق يعنى المفروض الغنيه تكون لوم للولد ( صحبو الوحيد ) ما للبنت

ولا شنو ؟؟

سلام ياشباب
والله تحليلكم جميل وزى ماقال ديكور (يغنى المغنى وكل على هواه)
عشان كدا ياعاشقة انا شايف كل زول الاغنية دى يخليها بى الفهم الوصلتو بيه

و

سلامات من جوه دقات القليبات

الحبيب ديكور

تقبل شكري على المرور

وفى انتظارك الاغنيه رايها واضح اكيد بس انا لما وضحت قلت ليه ما يكون الفهم بالطريقه التانيه
مجرد كلمة خيانه تخلى الواحد يفكر على طول فى البت والولد وممكن تكون الخيانه بين الاصحاب
اذا انا حانتظر نص جديد

عاشقه يا فردتى
كيفك تمام

تقبلى شكرى على ردودك السريعه

اذا كانت حبيبته ما عارفه بيه وهو كان بحكى لى صاحبو معناها انو صاحبو الغدر بيه والخانو Smile

ولا كيف
اللوم مفروض يكون للولد دى انا معاك فيها 10000000000000000000 %

محمد حمزه يا صديقي
تحياتى

مشرف عدد المساهمات : 357 تاريخ التسجيل : 05/08/2009

حبيبتنا بطوط كلامك فى محلو والله
ابقى قريبه Smile

محمد حمزه شنو ماكنا راجنك بى القصه
طبعا انا فهم الغنيه مااتغير عندى لانو واضح حتى بعد ماعرفته القصه
بس اثرت فينى والله يكون فى العون

الحمد لله انا كويسه يامهيار انته كيف...؟؟
العفو ياغالى نحنه سرعتنا سرعة دلفرى Very Happy

اى اى اكيد .. وشكرا ع التايد

الرائع ديكور نحنه فى انتظارك
وعندى ليك سؤال
كيف انتقلت الغنيه من بين يد السلطان الى حسين الصادق...؟؟
طبعا انا عارفه الموضوع منتهى بس انا ماجبته خبرو

سلامى ، وتحياتى ، واحترامى كاملا شاملا
شكرا للكل على المرور الجميل وتانى بقول (يغنى المغنى وكل على هواه)
وطبعا يامهيار كلامك فيه سلاسة تحليلية (محبوكة) وطبعا (كلام فنانين) وتعرف لانو حبيبنا (محمد حمزة) فى (موقع طه) حكى للجماعة ديل (ناس عاشقة وبطه) القصة كاملة عشان كده هم حاسينها .

طبعا (الغنيه) دى انته لو لاحظت ليها ممكن تتفسر على كم معنى (مابين الحقيقة والخيال) وفى اعتقادى ان الحقيقة دائما اجمل واقوى من الخيال

من كلام الناس ممكن نطلع بى فهمين :-
الاول :- ان (المتضرر) لم يبح لحبيبته بمشاعرة تجاهها لكنة (اتونس) مع صديقه فى الموضوع واصبح يعلم مدى حبه لها ، وفى هذه الحاله لايمكن ان نرمى اللوم عليها ولكن يتحمل (صاحبو الوحيد) الخيانه كااااااااااااااااااااملة .
الثانى :- انهم متفقون على الحب والوفاء و(الكل) يعلم ذلك ولكن ............... ، وفى هذه الحالة تعتبر (هى وصاحبو الوحيد) دخلو فى اطار الخيانة (سامح الله الجميع)

لكم الود (مسامحا)

سلامات وصياما مقبولا ولكم كل الدعاء

قبل ختام التحليل
نحن نطالب عزيزنا ديكور باغنية اخرى
إما فى شكل رد الحبيبه على المظلوم
او فى شكل رد الصديق على صديقه بتبرير الموقف

وانا (حاجز النص من هسه عشان ما تكون فى خرخره ) Surprised

بالله يا عاشقه ويا بطوطه ومحمد حمزه

الؤيد للنص التانى يرفع يدو

ديكور
تقبل عرفانى على تحليل تحليلى بصورة ابسط
واسهل وادى العيش لى خبازو

سلامى ، وتحياتى ، واحترامى كاملا شاملا

اولا يا عاشقة انا نسيت ارد ليك على سؤالك بخصوص الغنية مشت ل(حسين) كيف ؟

ياستى حسين كان (من اوآئل) الناس السمعو الاغنية دى ومن الناس الحسوها شديد وحسين (صوت جميل جدا) مافى كلام والغنية عجبتو وحبه يغنيها واستاذن منى ولم اتردد فى اعطائه الاذن بتسجيلها فى شريط كاسيت اسمه (صاحبى الوحيد) والاغنية الآن قانونيا ملك (شركة ابو عزبة للانتاج الفنى) .

مروركم جميل ياشباب وانا بعتبر انو الموضوع المفتوح بى جاى ده (اجمل موضوع فى المنتدى) مع الاعتذار لباقى المواضيع لكن بى جاى بلقى نفسى ماعارف ليه ........!! يمكن عشان الونسات عن الغنى وتفاصيله .

غايتو ماعارف لكن ونسة الغناء احلى منها مافى خاصة (التفاصيل).
مهيار فنان جدا ماتسالونى ليه !!!!!!!
بدون ماتحجز انا بكون سعيد لما تغنى لى ،،،،،،،

لكم الود

والله يا استاذ ديكور من غير ما اطول في الكلام انا ارتحته للغنيه دي سلطانيه والله الاستاذ طه اداهاا حقهابالذات في الشكل الموسيقي والتوزيع والكورس والصوت النسائي يعني مطبوخه علي نار هادئه بس بصراحه ما سمعتها عند حسين في الشريط الماستر
بس في النهايه الاغنيه ديكوريه وافتكر ده كفايه

سلامى ، وتحياتى ، واحترامى كاملا شاملا

عزيزى (ود النورانى) اتفق معك فى موضوع التوزيع و(النار الهادئة) وطبع دى واحدة من اهم مميزات طه ، ونتاج تفوفة على ابناء جيله وحتى البعد جيله والدليل على كده كلام حسين الصادق للاعلام فى حق طه .

لنا عودة

ولكم الود

مشرف عدد المساهمات : 357 تاريخ التسجيل : 05/08/2009

شكر ليك كتير ياديكور ع التوضيح
وانا كمان بايدكم الرائ فى انو طه سليمان غناها بصوره احسن
وده لانى انا عاشقة السلطان
واول شئ سمعتها منو يعنى فيكم تقولو انو مسخا لى اى فنان غيرو وده بالنسبه لى
والجاى اكتر والونسات فيها حتكون اكتر وانا هسه اخترته الغنيه الجايه Rolling Eyes

نطالب برد الصديق للحبيب الاتظلم

سلامى ، وتحياتى ، واحترامى كاملا شاملا

جينا راجعين للموضوع الجميل ده بعد طول غياب ونادو لى ناس مهيار وماذن وبطه وعاشقه ومحمد حمزة ونيدوكات وامونة الجديده و.........و......... كل الناس ،،، كل الناس .
فى نص جديد من صاحبو بعد سنة من (العرس)
والبداية بتقول على لسان صاحبه:

اعذرنى يا(صاحبى الوحيد) ، اعذرنى جد .. غلطان انا
ماضقت طعم الدنيا كيف .. من فرقتك تمت سنة

حنرجع ونكتب المقطع التانى وطبعا يا اخوانا النص ده بتاع حبيبنا (مهيار) يعنى يا بطه ما القاك بتغنى فيه فى حفلتك الجاية يا استاذه !!!!!!!

لكم الود (وحيدا)

مشرف عدد المساهمات : 357 تاريخ التسجيل : 05/08/2009

اييييييييق انحنه فى الانتظار
بس عليك الله ماتتاخر علينا

والله يا خوانا انا بعتبر انو الاغنية دى من اجمل الاغانى التغنت فى زمنا ده .

كلمات معبرة ولحن يتناسب تماما مع الكلمات ، والاداء جميل ، طبعا انا سمعتها عند الفنان الشاب حسين الصادق ، وياريت لو سمعتونا ليها بصوت طه

اجمل مافيها انها بتعالج مشكلة اجتماية تفشت فى الآونة الاخيرة بشكل مخيف وتعد من المسكوت عنه جهرا
(الخيانة)

تكمن روعة الاغنية فى جراتها ومناقشة هذا الموضوع الحساس

مشكورين

مشرف عدد المساهمات : 357 تاريخ التسجيل : 05/08/2009

ده رابط الغنيه بصوت السلطان
ومن موقعو الرسمى

http://www.tahasuliman.com/download/Sa7bi%20Alwa7eed%20-%20Fin.mp3

اسمعا وادينا رايك
ومشكور ع الطله

سلامى ، وتحياتى ، واحترامى كاملا شاملا

مشكورة يا عاشقة على الاغنية .
بفتش ليها لى زمن واغرب حاجة انى كنت بسمعها كل يوم لانو فعلا طه اجتهد فى توزيعها وتسجيلها بصورة مختلفة .
الله يجازى حرامى الموبايلات سرقها مع التلفون

لك الود (مسروقا)