غنى ياخرطوم_ محجوب شريف

غني يا خرطوم و غني و شدي أوتار المغني
و ضوي من جبهة شهيدك أمسياتك و اطمئني

نحن منك ريح و هبت
نار و شبت في وجوه الخانوا إسمك يا جميلة
و نحن يا ست الحبايب من ثمارك
في دروب الليل نهارك
و قبل ما يطول إنتظارك
نحن جينا

ديل أنحنا القالوا متنا
و قالوا فتنا
و قالوا للناس إنتهينا
جينا زي ما كنا حضنك يحتوينا

و لما فارسك فينا هب
و عب حجرك بالمحبة و بالأماني
صحى نار الثورة تاني
و جانا داخل
زي شعاع الشمس من كل المداخل
جانا أقدر
خت من فوق كتفك إيدو وهز بالمنشور و بشر
يومها فرهد في عيونك غصن أخضر
و فرحة أكبر
من شجونك و السلاسل يا جميلة

يومها كان ميلاد شهيدك
يلا غني و لاقي عيدك
و لي ثمارك لقي إيدك
جيل مكافح حل جيدك
و حل قيدك

و من غضبنا الحرو لافح
ياما باكر
من زنازين العساكر
نبني مجدك و مهرجانك
و كل قطرة دم عشانك
و لي جديدك يا جميلة