اغنية جديدة تحمل ردا من (صاحبو الوحيد)

سلامى وتحياتى ، واحترامى كاملا شاملا

انتم اهلى واحبتى واصدقائى واخوانى وخاصتى بل انتم (زاتى وزادى) لذلك قررت ان اتشارك معكم واشارككم كل الكتابات والغناء ، بل قررت ان يكون لكم مالى فى كل اغنية اكتبها طالما انتم معى .

فمن تظنون انة يمكن ان يغنى هذه الاغنية ؟!!

النص:

اعذرنى يا صاحبى الوحيد
اعذرنى جد غلطان انا
ماضقت طعم الدنيا كيف
من فرقتك تمت .. سنة

*******
النفس .. امارة هوى نفسى الخانت ودنا
الروح بلاك ماباقية روح
زايدات جروحى معاك جروح
قاسمتك الشك والعنا
والماضى ماداير يروح
خلينى احكى معاك .. ابوح
واعذرنى لوبنفع عذر والمستحيلات ممكنة

*******
ياصاحبى ماغلطان براى
شاركتنى وغلطان معاى
انت وانا وهى .. وكلنا
وانا من هواك ربيت هواى
والخوف من الزمن الجاى
زى مابقينا ليك قدر تبقى المقادير ضدنا

*******
انا قلبى اختار الطريق
ومشيت براى من دون رفيق
وحرقت بالنار .. المنى
ومابتطفى اعذارى الحريق
لكنى عشمان ياصديق
لوكان بينفعنا العشم انو الشبكنا يحلنا

_____________________

لكم الود والعودة للونسات والمناقشة

يعنى مالى غير ان تدمع عيناى من
ما تحمله هذه القصيده الفتاكة
والتى كما اعتقد قد فتكت فتكا بكل مشاعرى

من ما تحمله من معانى فياضه وكلمات خلف الكلمات ودموع خلف الدموع
وصراحة صراحة
صراحة

واعزرنى يا ديكورنا الوحيد
اعزرنى جد مقصر انا
لو شكرت النص براى
او مره واحده من المعاى

بكون اكيد غلطان انا

مداخله توش :
لى عوده قريييييييييييييييييييييييبه

دى المبالغه زااااااااااته

ياصاحبى ماغلطان براى
شاركتنى وغلطان معاى
انت وانا وهى .. وكلنا
وانا من هواك ربيت هواى
والخوف من الزمن الجاى
زى مابقينا ليك قدر تبقى المقادير ضدنا

التحية لديكورنا الجميل
القصيدة مليئة بالأحاسيس والمشاعر المتناقضة والمعاني المتضادة (الوفاء والخيانة - الإعتذار والشك في القبول - العتاب والتمسك بالعلاقة - الندم والتمسك بالصديق)
أحس انه توجد أحاسيس حرة تحوم وسط مفردات القصيدة محسوسه وغير منطوقة
وكانت براعتك الشديدة في إنك حصرت الكم الهائل من المعاني دا بس في علاقة البطل وصاحبه
وما تطرقت ولا قريب ولا من بعيد للطرف الثالث (البنت) ولا إحساسه تجاهها ولا هل هو سعيد ولو جزئياً بإستثناء جانب صديقة (بمعني جانب البنت ما عرفنا عنو حاجه وبالطريقة دى إلا تكتب هي وتورينا موقفها شنو؟؟؟؟؟؟؟؟

الاولى

انت زوله خطيره جدا بالمناسبه (وما تطرقت ولا قريب ولا من بعيد للطرف الثالث (البنت)
لكن شفتى الجمال ده كيف

لكم الود

مشرف عدد المساهمات : 132 تاريخ التسجيل : 05/08/2009

وانا من هواك ربيت هواى

كدى ركزو شوييييييه فى البيت دا
دا جبتو من وين يا ديكور؟؟؟!!!!!!!
كل المعانى العميقه ( عتب و اعتذار و تفسير بتتجلى فى البيت دا )

ومابتطفى اعذارى الحريق

يعنى هو بيعتذر و يائس فى نفس الوقت؟؟!!!! scratch

تسلم ايدك يا ديكور ,, والله اكتر من رائعه

هووووووووووووووووى انت لسه بتسأل البغنى منو ؟؟!!! أكييييييييييييييد انا طبعا و بلا نقاش lol!

لا لا فى نقاش ,, انا ممكن اغنى كلام البت صح ؟؟؟ هع هع هع afro

انت ليك كل الود والله

مشرف عدد المساهمات : 357 تاريخ التسجيل : 05/08/2009

روعه وفوق لى الروعه روعه
جد قريته كم مره
بس عجزته اقول فيها شنو
عجبتنى شديد وعجبنى مشاركتك لينا بيها
يغنيها منو اكيد انا حارشحها لى السلطان طه سليمان
بس باب التصويت فاتح

="مهيار"]الاولى

انت زوله خطيره جدا بالمناسبه (وما تطرقت ولا قريب ولا من بعيد للطرف الثالث (البنت)
لكن شفتى الجمال ده كيف

لكم الود[/quote]

التحية ليك سيدي مهيار
مشكور علي التقييم الجميل دا وأكيد طالع من زول جميل
ونحن جميعاً في حضرت الجميل ديكور
أتمني أن نفيد ونستفيد
ويلا لي قدام خلينا نعينكم عشان تبدعوا لينا

[siمهيار"]الاولى

انت زوله خطيره جدا بالمناسبه (وما تطرقت ولا قريب ولا من بعيد للطرف الثالث (البنت)
لكن شفتى الجمال ده كيف

[color=red]لكم الود
[انت وانا وهى .. وكلنا ........ شوف دي خطيرة كيف

ياربي اقول شنو ماعارف زاتو مبالغة يامان مبروك

بتعرف البولاغ دى كلمة جاية من كلمة موبالغة
وبالجد رد صاحبنا مبالغة وتسلم كتير يا حبيبنا
واقعد عافية

سلامى ، وتحياتى ، واحترامى كاملا شاملا
مشكورين ياشباب على المرور ،
ومشكورين على المرور ، وانا عايز اسال سؤال انتو ماشايفين انو الرد ده من صاحبو الوحيد مابتناسب مع مجتمعنا من ناحية الممارسات الحياتية والمقيدة بشكل الانتماء للعواطف والبعد من الانكسارات ، خاصة لو كانت المراة طرف اصيل فى الموضوع
بمعنى انو (صاحبو الوحيد) من المفترض ان يعيش حياتو دون الرجوع للخلف او اقحام محبوبته الكانت محبوبة صاحبه والتى اصبحت (زوجتة) الآن .
اليست حساسيتنا كسودانيين تمنعنا من مراجعة النفس مرة اخرى

مجرد سؤال واحتاج منكم لاجابة

لكم الود (حائرا)

مشرف عدد المساهمات : 357 تاريخ التسجيل : 05/08/2009

هو صح الرد مابعتبره واقعى اى انو انا بستبعد انو
صاحبو الوحيد يرد عليهو حتى ولو وجدت الندامه
لان العتزار صعبه فى هذه المواقع
لكن ده فى حد زاته غلط
اولا لان الاعتراف بى الزنب فضيله
تانيه طلب السماح والمسامحه طلب دينى مفروض ناديهو
لكن تانى بقول حساس وصعب
بتمنى تكونو فهمتونى
ولى عوده

التحية لأستاذي ديكور وللجميع
أنا عن نفسي لا أري عدم إنسجام القصيدة مع واقعنا لعدة أسباب:
أولاً : ومن القصيدة الأولي نحن فاهمين إنو الصداقة بين الإتنين شئ ما عادى بمعني إنها صداقة حقيقية شفيفة نابعه من القلب يبقي الجماعه ديل منعدمه بينهم فكرة الإنكسار ولا منو إعتذر لي منو إنت عارف بالطريق الأنا فاهمه بيها دي ممكن يجي يوم الصديق الأول يعتذر للتاني (دي طبعاً في المدينه الفاضلة بتاعتي براي، هههههههههه ). يعني مسألة الأعتذار ذاتها بتنبع من نفس متوازنه وشفافه.
ثانياً: مهمة الشعر إنو يهذبنا ويطلع مننا الحاجات الجميلة ويدعو للأخلاق والقيم السمحة وينقي نفوسنا من الشرور والأفكار السالبة بمختلف أنواعها، والشاعر نفسه أو الفنان عموماً لازم يكون علي درجه عالية من الوعي بما حوله والقصة ما ملكة وبس لأنو رسالته تعليمية قبل ما تكون ترفيهية أو للتسلية، فكل قصيدة لازم حمل فيها من الدروس الجميلة التي يستفيد منها المتلقي بطريق مباشرة أو غير مباشرة. وألحقني يا مهيار أنا اتكلمت كتير ثالثا ورابعا بخليها ليك......
لكم كل الحب
ولي عودة

سلامات يا ناس يا لساكنين قليبى الحساس

شكرا لتسليمك الرايه يالاولى

اولا :- نفيدكم علما باننى شاكرا كل الشكر للعزيز ديكور وافيدكم علما بانه تم تلحين العمل وتبقى التسجيل وموافقه اصحاب الشأن على اللحن
حقيقه جلسنا فى ه>ه الاغنيه كثيرا ودارت عدة نقاشات بينى وبين الملحن مازن وتم الاتصال بديكور لبعض الاستشارات وسمعنا منه وسمع منا
وعسي ولعلى اتوفق فى نقل احساس النص وروحه مع جمال التوزيع الموسيقي من الاخ مازن .... يعنى العمل فى الفرن وزايدين حرارته .

نجى للنص :

اعجبنى جدا الروح بلاك ما باقيه روح
زايدات جروحى معاك جروح
وقاسمتك الشك والعنا

هنا يكمن نوع من انواع الايمانيات وهى عتاب النفس ونلاحظ جيدا كيف يلوم الصديق نفسه بتلك العبارات والتى كما زكر ديكور انها خارج المألوف من حيث العوده الى الماضي والاعتزار عن شي حدث فى هزا العهد حيث انه يدرى اين اخطاء تحديدا وبالتالى يفهم كميات الالم التى سببها مما يدل ويؤكد بطريقه غير مباشره ان صاحب الرد ايضا يحمل كل انواع الروح الشفافه والحساسه وليس خائنا ومجردا من الاحاسيس حين حدث ما حدث فى النص الاول

ثانيا

انا قلبى اختار الطريقومشيت براى من دون رفيق
وحرقت بالنار .. المنى

انا عندى حبه اعتراض يا الاولى هنا فى انو حرق النار بالمُنى وما هو المُنى المقصود فى النص ؟

حتى وان كان عباره حرق دى اشوفها كتيره لانو هو مهما كان لا زال يحمل مشاعر للزوجه من ناحية اخرى وبعباره حرق حتى وان كانت امنيت صداقه تققل من شان الزوجه هنا ولا رايكم شنو ؟

اعذارى الحريق ومابتطفى
لكنى عشمان ياصديق
لوكان بينفعنا العشم انو الشبكنا يحلنا

الشبكنا يحلنا ؟ ده سؤال كبيييييييييييييييييييييير ومفتوح

سلامى ، وتحياتى ، واحترامى كاملا شاملا

سلامات ياحبايب :

عجبنى شديد شكل التناول والاهتمام بالنص والاتا بعتبرو فكرة متفرعة من فكرة النص الاول عشان مانعمل شكل ردود شعرية (درامية) ولاكتمال الصورة لابد من رد (للزولة) البتمثل الضلع الثالث للقضية دى .
لكن قبل مايجى النص الثالث خلونا نرجع لى سؤالى وتعليقاتكم
سؤالى كان عن علاقة النص بمجتمعنا (الحقيقى) وممارساته فى هذه الناحية ، وهل فى الامكان الرد من قبل (الصاحب) بهذه الصورة ؟
وفى اعتبارى ان (الاولى) تحدثت عن (لب الموضوع) وهو ان الشعر يجب ان يعالج الظواهر السالبة فى المجتمع بمختلف اشكالها ويجب ان يساعد على افشاء روح المثل الكريمة ومنها (الاعتذار ) ان اخطانا ووددنا ان نعالج ذلك الخطا ولاضير فى ذلك .
عموما اعتبر ان النص به دعوة للرجوع للنفس وعدم الانسياق وراء النفس الظالمة حتى وان كان ذلك باضعف الايمان .
وياحبيبنا مهيار سعدت جدا بمهاتفتكم لى انت والعزيز مآذن وانتم لاتحتاجون لموافقة من (اصحاب الشان) فالشان شانكم وانت اصحابة واصحابى واحبابى .
انا قلبى اختار الطريق ومشيت براى من دون رفيق
وحرقت بالنار المنى

المنى ربما : وجد نفسة قد تغول على امنيات غيرة وفى تغوله (احراق) لامانى (صاحبو) وهو اكثر من يعلمها وربما .......... وربما ..........

لكم الود ولنا عودة

[color=red00
((وحرقت بالنار .. المنى
ومابتطفى اعذارى الحريق
لكنى عشمان ياصديق
لوكان بينفعنا العشم انو الشبكنا يحلنا))

شكراً أخي مهيار ... شكراً أستاذي محمد

فعلا يا مهيار للحظة فكرت إنو ممكن يكون في تقليل من شأن الزوجة، لكن بعد رد الأستاذ أصبح من الممكن إنو يكون المني هي أمنيات صديقة المنكوب
وكده بتكون قمة الإحساس ....
لانو في المقطع البعدو قال (عشمان إنو الشبكنا يحلنا) ودي فيها قدريه وتسليم وبيوحي لي أنو سلم أمره للمجهول ولقوه أكبر منهم الثلاثة....
والله يعينهم علي بلواهم ويعينا
لكم كل الحب [/color]

[b] التحيه لاستاذنا ديكور طبعا انا يمكن دي من اكتر الكلمات اللمستني لانو بالصراحه كده عيشتها قبل ده ههه لكن اجمل مقطع عجبني بصراحه وبحب ادندن بيو بقيت
بتاع
ياصاحبى ماغلطان براى
شاركتنى وغلطان معاى
انت وانا وهى .. وكلنا
وانا من هواك ربيت هواى
والخوف من الزمن الجاى
زى مابقينا ليك قدر تبقى المقادير ضدنا
فعلا رساله اعتذار وفي نفس الوقت لوم سلمت يمناك على كتابتك الجميله يااستادنا

سلامى ، وتحيلتى ، واحترامى كاملا شاملا

وييييييييييييييييييييييييييين ياعمنا (mazinko) ، وين انتو ؟
منتظرنكم لينا كم يوم
لسة ما انتهيتو من اللحن
شوقتونا للسمع
اوعكم تكونو من الفنانين الكسالى
عندكم شنو
مفروض تكون المزاجات رايقة وتنتهو (لينا) من العمل ده
لو ممكن تسجلو وترفعوه لينا بى جاى
حتكون لفتة بارعة منكم
تخريمة:
انا زاتى عاجبنى المقطع العجبك ده ، وخاصة وانو فيه رمى لوم ، يعنى زى اللوم زاد على الراجل ده والموضوع ده تعبو شديد وحبة يوزعوا على الكل

لك الود (لحنا)

[b] والله يا اساتذ الاغنيه لحنتها وخلص توزيعها وكل حاجه وان شاء الله عما قريب حنرفعها ليكم بس اليومين دي يا استاذنا طريح القراش انا عشان كده ماسجلناها لسه لكن في الايام القادمه دي بالكتير حيكون العمل نازل عندكم وان شاء الله يا استاذنا اللحن والفكره العملتا بيها اللحن تعجبك Smile

سلامى ، وتحياتى ، واحترامى كاملا شاملا

كفارة وسلامتك عزيزنا mazinko والف عزيز كرامتك وربنا يديم عليك نعمة العافية
ربنا يقومك بالسلامة وترفع لينا الاغنية لنعلن للاحباب اول عمل غنائى تم على صفحات المنتدى من اوله لى آخره

حقيقى اتمنى ذلك قريبا ، حتى نضع ادبا جديدا

لك الود (ومن معك)

مشرف عدد المساهمات : 357 تاريخ التسجيل : 05/08/2009

محمد ديكور: سؤالى كان عن علاقة النص بمجتمعنا (الحقيقى) وممارساته فى هذه الناحية ، وهل فى الامكان الرد من قبل (الصاحب) بهذه الصورة ؟

المعتدى عليهو "عليكم الله شوفو ليهو اسم غير ده" فى صاحبى الوحيد كان بيسال البت
مالقيتى غير صاحبى الوحيد...؟؟
وده باكد لينا انو هو بلومها هى وماشايف انو صاحبو الوحيد غلطان لانو ابدا مالامو فى نص صاحبى الوحيد بل بى العكس لمن جاى يلومو عكسها الى القدر والنصيب
وبى رد صاحبو الوحيد ليهو عن البت لانها زوجته بعتبر رد ع سؤالك
لانه الرد هنا بيعتباره شال الحمل عن زوجته وده المفروض يحصل لانها صعبه ع البت ولو هى كان ردت معناها زوجها .. صاحبو الوحيد ندمان ع العلاقه قصدى ده الحاجه الممكن طنتبع لينا .. وباكدها نص الرد لانو ذى مافيهو اعتزار فيهو ملامه
عن جدالنص ده روعه وعباره عن مسرح درامى
فيهو كتير من التناقضات ذى مثلا
اعذرنى جد غلطان انا
ياصاحبى ماغلطان براى
وده بعتبره معبر عن القصه وعن حالة النص المعاشه
مبروك الغنيه ليك يامهيار
وفى الانتظار ع احر من الجمر

اعجبنى جدا شكل الطرح وتناول النصوص بالطريقة دى لانها بتخلى الناس اكثر قربا من النص ومفرداته ومعانيه ، بل اتخيل لى المستفيد الاول منها الحبيب (محمد ديكور)

ومن ثم باقى الاحباب من اعضاء المنتدى

وخقيقى وجدت متعة عند اطلاعى على هذا الموضوع وقررت ان ابدا به مشاركاتى

استمعت لاغنية (صاحبى الوحيد) واعتبرها من الاعمال الناجحة فى خارطة الغناء السودانى هذه الايام

استمعت لها بطريقتين
الاولى لطه سليمان والثانية لحسين الصادق ولاحظت اوجه الاختلاف بينهما ولا اجامل ان قلت اننى استمع لها احيانا هنا واحيانا هناك

واعجبتنى الآن فكرة (الرد) وتناوله ايضا
وسوف اعود قريبا للتعليق على مادار

فى العافية

ما إنت سيدنا وسيد ريدنا يا سيد الناس
انا ما داير او ما قادر اقول اكتر من كده

الاغنيه موجوده فى قسم الاغانى نرجوا مشاركتم لنا بعد الاستماع اليها

تقبلوا ودى

مهيار محمد نجيب

» جديد لنج لسة الحبر ما نشف
» الـفـ طه سليمان - صاحبى الوحيد ـنـان
» اغنية امدر اخر انتاج ديكور وطه
» مفاجئة جديدة
» صديقة جديدة للمنتدى