من تعرف من هؤلاء ؟؟

يا نجوم الليل اشهدي
علي لوعتي وتسهدي
علي بكاي وتنهدي
٭٭٭
من ليهو حُسن الكون هُدي
النافر الجافي الهدي
يا عيني يوم تشاهدي
اقري السلام واستشهدي
٭٭٭
يا عيني دمعك بنّدي؟؟
قول العوازل فندي؟؟
انا لي غرام يا معاندي
في زهرة الخد الندي
٭٭٭
يا عيني ابقي ترصّدي
عسي توجدي ما تقصدي
مهما جرح قلبي الصدي
هو برضو غاية مقصدي
٭٭٭
قمرا حماني تهجدي
وتركني فاقد منجدي
آه من صفارو العسجدي
وعينو المتل عين الجدي
٭٭٭
يا من خرقت عوايدي
ونظمت فيك قصايدي
لو عمري شيئا في يدي
لوهبتو ليك يا سيدي

تسلمى تسلمى ياعاشقه و انشالله تستفيدى اكتر

( الديكورى العظيم ) والله انا النوع دا من الشعر المنظوم بيعجبنى شديييد لأمو اذا قارناهو بالقافيه العاديه بيكون اصعب منها شدييييد

يعنى هسى البيت الانت كتبتو رااااااااائع و قمه فى الذكاء ,, يعنى الشعر بيستلزم ذكاء عجيييييب و البيحير اكتر انو الناس الزمان ما كلهم كانو متعلمين او دخلو مدارس ,, اغلبهم دخلو خلاوى ( وهنا ممكن نفتح موضوع فى المنتدى الاسلامى لنتحدث عن اعجاز القران العظيم )

و برضو ملكة الكتابه او الشعر بكل انواعه لا تعطى لأى كان ,, يعنى كلنا بنمر بى نفس البيمرو بيهو الشعراء و عايشين معاهم و فى نفس المجتمع و افراحنا و احزانا وحده بس ما كلنا بنقدر ننظم كلام جمييييل كده و بالذات لو بالطريقه دى يعنى نعرف معانى كتيييره لى نفس الكلمه و نستخدمنا بى طريقه رائعه ( الجناس )

بالجد العاجبنى عدم توفر المدارس و المعاهد و الجامعات قديما ووجود هذا الكم من العظماء !!!!!!!!!!