لقاء ديكور وخالد الوزير على هارمونى

--------------------------------------------------------------------------------
[size=18]
استضافت المذيعه فاطمه الصادق على شاشة هارموني آفى اول ايام رمضان اللقاء الرائع حقآ
بين الشاعر الكبير والمبدع :محمد ديكور ، والشعر الكبير آيضا خالد الوزير
وكان محور الحديث عن الآغاني" الهابطة" كما تدعي المذيعة ......! فاطمة
الصادق ، وكانت تحاول ان تقنع المشاهد ان الشعر الذي يكتبة الآستاذين انه هابط ولكن كـــــــــانو لها بالمرصاد
واقنعوها انه لايوجد غناء هابط مالم يخدش الحياء والحشمة،
وكانت تقول لخالد الوزير : فسر لي المقطع في غنية "رمزة" البقول
عملو لي رايحن. فضحك خالد الوزير قائلآ: انا لو قلتة ليك (ماتعملي لي رايحة ) فيها حاجة! فوقفت المذيعة كحمار الشيخ في العقبة,
خالد الوزير وانا اقتنعت تماما بوجهة نظرو فى تعريف الغنا الهابط
وهو قال اى كلام يخدش الحياء هو غنا هابط وطبعا الكلام ده مفهوم واضح
وآن هذا النوع من الغناء موجود من زمن الفنانين الكبار ويعرف بإسم (الدكاكيني) وضرب بمثل وقال: ماتغنى بة الآساتذة القدام
مثل( الكبري فتحو وانا قلبي شرحو) ، وبسطونة والساعة والقجيجة لماعة
الشال نوم عيني جني رفاعة..وكذلك السكر اصلو مقصقص يا القصقصوك فص فص).
وبعد ده كلو لسه مااقتنعت مقدمة البرنامج وعملت ليها (كــــــــبري) كبير نمشي لي استطلاع خارجي
ونجي راجعين.
فى بعض الاستطلاعات تحدث التجانى حاج موسى عن الغناء الهابط حسب وجهة نظرو طبعا بانو ما مفروض اكو ن فى كلام بالشكل ده والكلام الكتير عن الغنا الهابط وانتو عارفنو
انا بااجد عجبنى رد ديكور وهو انو التجانى كان رئيس لجنة المصنفات الادبيه وغنا زى ده كتير مر بيهو واجازو هو ونزل فى شرايط كاسيت بمعنى انو التجانى سمح للغنا ده بالظهو وفى شرايط الكاسيت كمان فكان كلام ديكور للتجانى حاج موسى ( لا تنهى عن خلق وتأتى بمثله عار عليك اذا فعلت عظيما )
وايضا استطلاعات وسط طلاب الجامعات وكان السئوال كالاتى ( ما هو رايك فى الغنا الهابط ) يعنى السؤال بفرض عليك الاجابه
وكانت الاجوبة.
والله آنا مابسمعو، مفروض نقضي على نوع زي دة من الغنا، ده غنا مسموم
وغيرهامن الاجوبة الغير مقنعة..، وعند وصولها لي خالد الوزير اها !رايك شنو في الكلام القالو الشباب!
فرد بكل سرور وتماسك الشباب البتكلمو ديل نصهم خاتين نوع الاغاني دي. فقالت ليه؟ مامصدقة.وقال ليها عشان آوريك انو الناس دي بتحب الغنا البقولو عنو هابط .
قبل سنتين كان في حفل في جامعة آمدرمان الآهلية وكان بي الآستاذ الكبير (طه سليمان) ولضيق
الوقت لم يستطع الفنان اكمال الحفل وكان الجمهور الغفير يترقب آغنيه
"سنتر الخرطوم" اغنية الاستاذ ديكور الشهيره فأصر الجمهور على ان لايخرج طه سليمان مالم يغني لهم تلك الاغنية.
فكان سؤال الشاعر كيف تقولي لي انو الناس مابتحب سنتر الخرطوم ولا رمزة ولا ماشة معاك عسل .فكان رد فعل تلك المذيعه ان بان على وجهها الصخب .
وكانت كلمة الشاعر محمد ديكور الاخيرة في ختام الحلقة انو وجهه رسالة لي الإعلامين والصحفين انو مافي مشكلة بتتحلة بي المهاترات والكلام الغريب البكتبو فيهو ده
حاجه اثارت اهتمامى من كلام ديكور انو لمن احبو اروج لاغنيه من اغنياته بخليها تصل الصحافه والصحفيين وهم عليهم الباقى
وده سؤال منى هل هو زكاء من ديكور لا نتشار اغنياته ام هو ام هو غباء من الصحاف الفنيه لانشار الغنا البقولو هابط
وكانت كلمة الشاعر خالد الوزير الآخيرة : انو النوع البتحدثو عنو الفنانين الكبار الغنا الهابط موجود والآرشيف موجود والتاريخ لاينسى!
انا والله بحى اساتذتنا ديكور وخالد الوزير وهم مثلو الشباب خير تمثيل واتكلمو بكل صراحه وفى حاجه مهمه مفروض نتبه ليها من كلام ديكور وخالد الوزير الاعلام والصحافه الفنيه هى سبب البلاوى دى كلها

[/size]

مشرف عدد المساهمات : 132 تاريخ التسجيل : 05/08/2009

]ينصر دينكم والله

رفعتو راسنا,, انا زعلانه شدييييييد عشان الحلقه فاتتنى نسبه لظروف خارجه عن ارادتى و بطلب من اى زول عارف مواعيد الاعاده ياريت يورينى

و بشكر نيدوكات الجميل على نقل الاحداث

من الفخر انى اكون بعرف الاتنين معرفه شخصيه ,, محمد ديكور و خالد الوزير ,, و الاتنين ناس محترمه شديييييييد و من عدم الذوق اننا ننسب ليهم و لى كتاباتهم اسم ( هابط ) لأنه لا يليق بمكانتهم و لا حسهم الفنى الراقى

و المشكله الاساسيه بالجد هى الاعلام السئ الصور الاغانى دى بى صورة سيئة و ختاها تحت مسمى ( هابط ) و خلى اسماء كتييييره زى ( خفيفه ,, بسيطه ,, او حتى شعبيه ) و زى ما قال الديكورى العزيز ( لاتنهى عن خلق و تأتى بمثله عار عليك اذا فعلت عظيم ) يعنى الناس تجيز و اول ما ( رجرجة الاعلاميين ) يبدو رايهم عن الاعمال دى يعملو ليك فيها الشريف الرضى و انهم ما بيسمعو الكلام دا ,, عار عليهم

و لو مصرين شديييد بقولها و بفخر و بأعلى صوت

]( نحن جيل هاااااااااااااابط )

مشرف عدد المساهمات : 357 تاريخ التسجيل : 05/08/2009

الله يخليك يانيدوكات ع نقل الطرح المفيد ده
وحتى انا ماحضرته الحلقه بس كان نفسى احضره
افتخرته جدا بى كلام شعرنا العظماء ديكور والوزير
اما كلامى عن الاغانى التحت مسمى هابط فكمل
ومليت وانا اقول مانسميها كده لانها ماهابطه لذيذه
بس الحمد لله استاذتنا ماقصرو كلامهم عجبنى جد ومقنع شديد
فمابالكم لى ناس خاتين فى بالهم المسمى ده وبحاول بقدر الامكان ساعين انو يشوهو سمعت النوع الفنى الخفيف
ع نظام يتخلصو منو انا متاكده كلام ديكور والوزير رح يغير وجهة نظر ناس كتار وده نابع من ثقه
غير انو ياخ والله يحيرو الناس وكت هو غنه هابط ومعترضين على بسمعو ليه؟! لو من بعيد لى
{يقولون بافواههم ماليس فى قلوبهم}

بطه و عاشقه السلطان أول حاجه مشتاقين
تاني حاجه نيدوكديسه ماقصر والله بس
انا عندي حكايه بتاعت ربع ساعه مسجله من الحلقه
حا نرفعه ليكم انشاءالله في المنتدي هنا ونبرد ليكم ناركم

مشرف عدد المساهمات : 132 تاريخ التسجيل : 05/08/2009

الله عليك ياود المهدى جيت وجااااااايب و محمل

مشتاقين بالأكتر و ليك وحشه كبيييييره

يلا ارفعا لينا سرييييع برررد لينا نارنا

والله يا نيدوكات ماقصرت وبالجد بسطتنا شديد فى سرد ما حدث من تفاصيل بالحلقة. وخصوصا انو نحنا ماحضرناها.
وياودالمهدى عليك الله ماتشحتف لينا روحنا وجيب لينا الجزء السجلتو دا

مشرف عدد المساهمات : 357 تاريخ التسجيل : 05/08/2009

بى الاكتر ... ياودالمهدى
فى انتظارك

سلامى ، وتحياتى ، واحترامى كاملا شاملا

الموضوع ده يا اخوانا داير اخونا وحبيبنا (رانى) بالله ياعم (حسين) كلمو لينا خليه يجينا بى جاى
انا شايفو طول من الدخول
مالو
اوع يكون زعلان مننا
والله نحنا زعلو مابنقدر عليه
دايرين نتونس معاه
ولو شاف مننا حاجة زعلته نحنا بنعتذر فى هذه الايام المباركات

بس اوع يكون فهم كلامنا غلط
نحنا قاصدين الصاح
شوفو لينا يا السيد المراقب

لكم الود

عيان يا عفنين عشان مافي زول بسال مني
بيني و بينك يا ديكور فاتتك( فطرتا لي يومين بي النهار)
و اشكر سؤالك عني زي الحاجة السمحة كده

و الله بيني بينك يا مدير ...
الزول دا بقت ليهو عادة ... دا رمضان التاني كدا يكون جالد فيهو يومين تلاتة كدا ...
المرة الفاتت كانت ملاريا بي حقنا ... و طبعاً رسلنا وفد من عندنا عشان يآزر العزيز ووريار في مسألة الحقن دي... و قد كان ...

وقيع الله كتب:: و الله بيني بينك يا مدير ...
الزول دا بقت ليهو عادة ... دا رمضان التاني كدا يكون جالد فيهو يومين تلاتة كدا ...
المرة الفاتت كانت ملاريا بي حقنا ... و طبعاً رسلنا وفد من عندنا عشان يآزر العزيز ووريار في مسألة الحقن دي... و قد كان ...

الله الله
رمضان كريم يا السيد المراقب و الامضاءات محفوظة

الغالي ووريار
جعلها الله كفارة لذنبك
و ألف بعد الشر عليك ...

سلامى ، وتحياتى ، واحترامى كاملا شاملا

طبعا كان عندى احساس انكم بتدخلو المنتدى من جهاز واحد والليله اتاكدت تماما بعد موضوع الملاريات والحقن و(الامضاءات) دى الله يسترنا معاكم !!

عموما كفارة ياحبيبنا واهو يومين سندة من الله ربنا يدينا ليهم لكن بدون حقن و....
آمين
لكم الود (سقنيتشر)

انت ما متذكر ملااريتك العندنا يا ديكور ... بس ... نفس الفلم

يبدو ان العزيز ديكور عندو مشكلة اكمال التعليم التقني Smile

اضغط هنا

كتب nidocat في يوم الاثنين 24-اغسطس-2009
موضوع بعنوان لقاء ديكور و خالد الوزير علي هارموني
استضافت المذيعه فاطمه الصادق على شاشة هارموني آفى اول ايام رمضان اللقاء الرائع حقآ بين الشاعر الكبير والمبدع :محمد ديكور ، والشعر الكبير آيضا خالد الوزير وكان محور الحديث عن الآغاني" الهابطة" كما تدعي المذيعة ......! فاطمة الصادق
حقيقي اعجبني جدا تطرق قناة هارموني للموضوع في حين ان كثير من التلفزيونات و مقدمي البرامج قد ابتعدوا عن هذا الموضوع اما خوفا من تشعب الموضوع او ابتعادا من صعوبة ادارته .
و من المداخلات الجميلة اعجبني تعريف ل ba6a79 عندما قالت : المشكله الاساسيه بالجد هى الاعلام السئ الصور الاغانى دى بى صورة سيئة و ختاها تحت مسمى ( هابط ) و خلى اسماء كتييييره زى ( خفيفه ,, بسيطه ,, او حتى شعبيه )
انا حقيقي شاهدتا اخر مقاطع من السهرة لاكين الموضوع زي كان مفتوح قبل كده بي فترة في اوساط كتيرة انا كنت موجود فيها لحسن او لسو حظي لا ادري اخراها كانت مع الفنان المرهف طه سليمان و الاخ العزيز مراقب الموقع (وقيع الله) و الموضوع امتدا لساعات و ساعات كانت كدقائق في صحبة طه ووقيع الله .
و كل الذين انتقدوا ادواتنا في التعبير عن حاجاتنا كجيل (قنبلة , ما تجيبي لي الهوا , طبنجة ) نسوا ان الشعر الجاهلي و الذي يعتبر مرجع في الفصاحة (و مافي زول بيقدر يقول عليهو هابط) مليان جدا بي مفردات اصابني سهم عيونها و شككني رماح حبها و في كم من موضع شبهو الحب بالحرب فتلك ادواتهم (يعني لو كان عندهم طبنجات و قنابل كانو استخدموها ).
و اتفق مع ba6a79 عندما عرفت الغنية و قالت خفيغة و بسيطة او حتي شعبية لاكين مفعولها بيزول سريع و دي حقيقة النوع دا من الاغاني مفعولو بيزول بسرعة يعني زي البندول تاخدها و قت الحاجة اليها و بس يعني زهجان بتسمعا و لمن زهجتك تفك خلاص و دا ما بيخلي الاغنية لصيقة بالوجان الشعبي يعني النوع دا من الاغاني بيتنس بي سرعة يعني قبال سنتين لو الفنان ما غنا ليك عوض دكام في الحفلة احتمال كبير ما تديهو باقي عدادو اي كانت من اساسيات الحفلات لاكين من يذكر عوض دكام (كاغنية) الان . اعتقد لا احد و اخدت مكانها اغنيات تانية ما اجمل منها لاكين بس بي حكم التجديد السائد راحت فيها فقل ما يطلبها احدهم .
فهل دا المصير الدايرو الفنان لي اغانيهو . بعد سنتين الموضوع خلاص بح يعني مدة صلاحية الاغنية الشبابية سنتين شوف اغنيات عتيقة عاشت عبر العصور لا تحصي .
و السؤال الاهم هل لمن يقولو لي اغنيتك المفضلة شنو بقدر اقول عوض دكام بي ملئ فاهي كده و هل في حالت سؤالك بصراحة عن اغنيتك المفضلة هل بتتبادر الي ذهنك تلك اللونية من الاغاني ؟
مع انو كلام يا عوض دكام دي فهم راقي جدا من اخونا ديكور و لا تمت للهبوط باي صلة و دي اغنية اصلاحية للمجتمع تناقش قضايا مسكوت عنها و كانت الخطة ان تتم update بي صورة دورية ليها لتكون اشبه بمجلة تتجدد دوريا .
فل يعترف الجميع اننا نرزخ تحت اراء جيل (لعاب جكسا و غناي الشفيع) و ما عندهم اي قناعة بي البنسوي فيهو و هم العصرالذهبي في الغنا و العصر الذهبي في المسرح و العصر الذهبي في الكورة و غيرهم لاشي لاكن هل الرد عليهم يكون بمبداء (كل الفنانين الكبار ديل غنو غنو دكاكيني ) و نحن موثقين ليكم بي فلسفة انت زاتك ما سكرتا .
ولا الرد بيكون بل اقناع الاخرين بي وجهة نظري بي ادوات علمية (انا ما قاعد ادافع عن قضيتي) .
العصبية الواضحة و المقاطعة الكثيرة علي الرغم من قلة ما شاهدت من الحلقة لكنها كانت بينة .
اي لمن الزول يهبشو في حاجاتو بيكون ما طبيعي لاكين امتلاك الادوات المناسبة دا بيسوقك لي اقناع اشخاص اكثر و الانفعال لا يعني انك علي حق .
و للحديث بقية
و لكم الود

سلامى ، وتحياتى ، واحترامى كاملا شاملا

كل الشكر للحبيب Last_Warrior على الآرآء المفيدة حقا والتى لابد وان تؤخذ بعين الاعتبار لمرجعيتها (المتينة) اولا لانها قد خرجت من احد الشباب المتطلعين لغد مشرق مافى ذلك شك والمستنيرين بالمعرفة ، المستصحبين لخبرات كبيرة فى المجال بحكم المعايشة والتاريخ .......(شمبات)

اتفق معك على اعجابى برد ba6a79 والذى لخص (لب الموضوع) تماما واعلن اعجابى بحديثك عن الشعر الجاهلى ومقارنته بشكل الادوات وتغيرها مابين تلك العهود والآن وتاثير المجتمعات وادواتها على (الآدآب والفنون).

وماكلمتونا عن ونستكم انت والسيد (المراقب) واخونا طه سليمان (الشمااااااااااااااااااااااار).

اختلف معك فى موضوع (الاغنية البندول) لان الاغانى والمواقف تتعدد ، بمعنى ان من عمرة الآن 40 سنة يمكن ان تؤثر فيه اغنية كتبت قبل 100 عام والدليل على حديثى هذا ان الشباب الآن يرددون (العربية ، والبنسلين ، والليمون سقايتو على و باكو سجاير و .......و...... الخ) . واذا اعتبرنا ان اغنية (عوض دكام) من نوع هذه الاغنيات الخفيفة فهى الى الآن مطلوبة فى الحفلات العامة والخاصة بل يتمشدق بها (انصاف الصحفيين) لخلق الاثارة الصحفية .
اول مرة اشوف لى بنادول مفعولو 5 سنين ( صداع عمرى) .
اخيرا : اتفق مع العزيزLast_Warrior على ان الحجة ينبغى ان تكون اقوى ولكن لم يكون المقام للدفاع عن هذا الجيل بل للدفاع عن شكل ومضمون الاغانى واحساس (رمى اللوم) علينا فاحببنا تذكير الناس بان هذا النمط ليس ملك لنا ولكنا توارثناه جيلا بعد جيل وهذه حقيقة .
تخريمة : والله يا (ودصرص) ناس ابوداؤود والعطبراوى ديل لو لقو ليهم (MP3) امبيثرياية واحداية كان سمعتو جنس غناء (اللهم انى صائم)

لك الود (منتشرا)

لاست ووريار ... دمتم و دام قلمكم الرصين

» ادعوكم للترحيب بالاخ خالد الوزير
» ممكن يا ديكور
» ديكور زمانك
» ديكور ورائعة خضر بشير
» مسابقة ديكور الرمضانية