محمد الحسن سالم حميد2

وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
يا يمة حان الامتحان
من وقتو بس فاضل شهر
ما اظنِي من جور الزمان
انجح واجيب ليكم نمر
وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
كيف زاتي يا نبع الحنان
انجح من الام السهر
عمرك سمعتيلك جبان
خاض المعارك وانتصر
زينوبة كل ما افتح كتاب
القاك في اول سطر
القى الجداول والصحاب
القى الجناين والتمر
في الحصة عقلى انا قام سدر
يمه المدرس لو فكر
كان يلقى قاعد فوق ككر
في الدونكا لسع ما فطر
يسمع كليمة يا عشاى
واغلى الحكم عند الضجر
انا قلبي كلو على جناي
وقلب جنايا على حجر
والله مش لو كان نهر
لو كالني بسيطان بقر
ما دام عقيل الجن سدر
ما اظنو من عندك حضر
بذاتو ابوى تلقاهو قا
فاتح كتابو مع الفجر
يقرأ ويرتل في كل
ما بفهمو الناس الكفر
زينوبة كر من حالى كر
قاعد لى فوق كيمان جمر
غربة وكمان حالاً فقر
عذبني قبل اصل القبر
الشوق متل شوك الكتر
طعن الجسم لمن خدر
والله لو ما بنقبل
ما كان بفارقك بي شبر
زينوبة دنيا الاغتراب
خلتني زي ورق الشدر
انحت من عدم الشراب
عم الاراضى وانتشر
الغربة اصلوا طعيمة مر
لكني بعقد بالجبر
لمن سنين الهم تمر
يا ربي الهمني الصبر

إنت لي بتقول كلام
والقلب شايف كلام
والحصل منك تمام
خلّى من ريدنا السلام

**** **** ****
شمعة الحنية راحت
روحة في جوف الضلام
والطيور على دوحة ناحت
تاني هقِّل ياغمام

**** **** ****
وينك آرمل التلاقي
وويني يا بدر التمام
والفقش فاح بالسواقي
مالو بتحتحت تُمام ؟

**** **** ****
ماني مَن يرمي الحمالة
وفوق مقاديرو الملام
لا أبرئ النفس ماله
ومال مشاوير الغرام

**** **** ****
من قبل يبدا الخصام
كنت عارفاهو الختام
إنت داب نفسك دوام
وقلبي داب في الهم وعام

**** **** ****
نفسي أبني البرج عالي
وإنت متواتي الحمام
ساعا لي شح الليالي
ماهو للترف الحرام

**** ***
ما إصطفيتك لي برايا
لي ولي أهلي القراب
إشتهيتك زول ضرايا
وشفت فيك راجل عقاب

**** **** ****
قلتَّ لي خلِّي القراية
والنشوف الفي الكتاب
بيكى أحقق تام منايا
وليكي أحلام الشباب

**** **** ***
كيف تبعتك واعمايا
وكيف بريتك يا سراب
وليش حريتك لي سمايا
وإنت نافد يا سحاب ؟!

**** **** ****
خاتي أنا الصدَّق رواية
من خيال الإغتراب
يا اللي فاكر الريد غواية
غاب ضميرك واللا عاب

**** **** ****
ألف ليلى وليل بلايا
بإنتظارك في ألف باب
وفي شرف بالي البلايا
وألف مرحب ويا حباب

*** **** *****
قادرة أبسم في النهاية
صابرة بتخطى الصعاب
عندي ما فيهو الكفاية
من نَفَس تسّب تساب

**** **** ****
عيني في عينة هوايا
حبي مدفون في التراب
أروي بي دمعي ودمايا
وماب يشيلو الريح هباب

لا متين يا هم تشرق
الزمان الساعة سايرة
المكان فوق أرضو دائرة
حمتو قاعد .. والحدادي الفيها قاعد
من جهنم طايرة
بالحديد الواطة فايرة
والعرق نازل يغرق
راسو مقطوع حيرتو حايرة
فكرو واقف بين يطرِّق
وبين يشيل جالون(زادو) يشرِّق
يمسك المنجل يطرِّق
قلبو ينبر الشاكوش يطربِق دقّو والمنجل ينقنق
حمتو دقّك دق مقلق
في حشاي يوقد يحرِّق
حمتو شرِّق
حمتو شرِّق
حمتو شرِّق
شان تفرِّق
وحمتو مشلول بين يطرِّق
وبين يشيل جالون يشرِّق
داخُل الوسواس يوسوِس
"حمتو منّو وليك تقرِّش
تاني منُّو وليك تفلِّس"
حمتو لا ولدوك مهندس
حمتو لا خلقوك مدرس
لي ثواني الحال بنعوش
وتاني حالاً زين يمغِّس
فيكَ بوم الهم معشعش
ليك سنين في الفوق تحنِّس
تأبى تتغاباك تطرطِش
وهسّه قبّال ما تفلِّس
ولي جريد البؤس تنقرِش
ولامتين للرأس تنكِّس
لامتين ياحمتو شرِّق
عدِّي فرِّق ..
ندِّي ونِّس
حمتو شرِّق
حمتو شرِّق
وحمتو مصلوب بين يطرِّق
وبين يشيل جالون يشرِّق
فكرو مشتت مسرِّح
بالو يتذكر بعيد
ساعتو لامن كان شويفع
كان بيلعب بالحديد
كان بيفرح لمّا أبوهو
يدِّي ردمة من الحديد
بينه يسرح كلُّو يرتع
لاهي مبسوطاً سعيد
ما يهمُّو قميص مرقَّع
ولاَّ برطوشاً جديد
ياما قام زير دمّو نقَّع
وجسمو نبَّق بالحديد
وبرضو يرجع كلُّو يرتع
لاهي مبسوطاً سعيد
من ضواحي اللاوجود
حمتو جا العالم طريد
ماشي بين الناس وحيد
تمرة حايمي بلا جريد
ما حصل مدّت لو إيد
شان تبارك ليهو عيد
ومين يبارك لي بعيد
كل يوم في قيد جديد
هام وقضَّى صباهو صائع
لا صويحب لا نديد
وحمتو مرَّة سأل أبوهو
لمّا شفَّع كاتلوهو
وجعوهو وحندكوهو
يابا وين طينَّا وأرضنا ؟؟
قام أبوهو إنضارى غادي
ورشَّ بي دمعو الحدادي
وحمتو صاقع وين أرضنا ؟
وين دواليبنا وأوضنا
وين أهلنا ووين بلدنا
وليش بعضنا يدوس بعضنا ؟؟؟؟
تاني أبوهو إنضارى غادي
ورشَّ بي دمُّو الحدادي
إنت مالك يابا ساكـِ ..
يي مالك الدقّاك مِنو
قام أبوهو إستغفر الله
وشالُّو ملِّين قالُّو يلاَّ
إشتريبه حلاوة يلاَّ
حمتو راح باع الحلاوة
وفي الدرب حاشوهو شفَّع
ومن قَبُل يصل الحدادي
نوحو كان سبّاق وأسرع
(ورا)خِبر أبوهو سبب بكاهو
من عقاب صوتاً مقطَّع
قام رجالة عشان يحصِّل
لاحظ الخطوات بترجع
لي طويقات غلبو قفَّل
وكفلت القلب الموجع
حائط الأيام تكسَّر
حمتو شبَّا وكلما يكبر
كلما يصغر
والهموم أكوامة تكتَّر
فوق رويحتو وكلما يودر
هم قَبُل ما حمتو ينسر
يلقى تاني التحتو بنقَّر
ثار .. وسلّم لي قسمتو
وبرضو ما سابو المقدر
جاء الخريف في ليلة هذّر
لي كرارق حمتو كسَّر
للعفيش والعدِّي شتت
والحديد الراجي صقَّر
في جنينة سيدي صنقر
تحتو كوم أطفال مقمبر
وأم بترفع في الأيادي
وفي الفراغ الصوت تكسَّر
صمتو سبَّا .. وأهَّا زفَّر
فكرو طلوح فات وبحَّر
في متاهات ماب تُقدَّر
والمطر بيناتو مطَّر
لي كرارِق ذاتو كسَّر
وحمتو حد ما يوم يعاين
للبيوت روق الجنائن
زي لويمبة وسط رتاين
حمتو بس يسكُت يعاين
بس يعاين
بس يعاين
لمّا تسألو يوم عن إسمو
حمتو لي إسمين يملِّي
حمتو ماب يعرف قراية
وحمتو ماب يخبر يصلَّي
إلاَّ بس يعرف يغنِّي
ولي شراب الروح يدلِّي
يطرا لامن ماتت أمُّو
ما اتلقوا أخواته اليحمُّو
ما لقى الإيد التريِّح
لا إتلقوا الناس اليجمو
ما اتلقى الزول اليصيِّح
لا اتلقوا الفقراء اليصلُّو
رغم إنُّو وإنُّو إنُّو ؟؟
ما مقصِّر كلُّو كلُّو
بينو عوعا وبينو صيَّح
دمعو حمَّا ودمعو ريَّح
قلبو صلَّى وقلبو سبَّح
وبينو حلَّ وبينو ينزح
ينزح
ينزح
ينزح
ومرت الأيام درايش
وحمتو محتار كيف هو عايش ؟؟
جاري في الأرزاق يحاوِش
رُبْ وقع بيناته دايش
حمتو مات بين المعايش
حمتو مات مع إنُّو عايش
وما بكت غير الحدادي
مات وماطقَّالو صايح
لا خبيرو طقش رادي
مات وما نعتو الجرائد
لا بقت لو قبير بلادي
مات وسبَّلتو الحدادي
ونعشو شيعتو الأنادي
مات وكت قوق الحمائم
نتَّفو الصقر الرمادي
والجرب صاد البهائم
قاطع الغيث البوادي
لامن النيل بينَّا صقَّر
في الحفائر مويتو صادي
وماشي صدَّا حرِد بلدنا
طاش يلوص ..
كايسلو وادي
مات وكت ماتت مثلنا
واقعي لاحيله وتنادي
ولمّا صوت الرب تكسَّر
والقيم باتت قلادي
مات مع الإنسان وسطنا
ويوم صِبِح عالمنا مادِّي
ولامن الصلاَّي تبول
في قفا الجامع عبادي
عاش وما عاش إعتيادي
مات وما مات إعتيادي
وحمتو في الآخرة ويعاين
للبيوت روق الجنائن
وحمتو حد ما يوم يعاين
للبيوت روق الجنائن
زي لويمبة (لهيبة) وسط رتاين
حمتو بس يسكُت يعاين
بس يعاين
بس يعاين
بس يعاين .

يا جمة حشا المغبون .. في الزمن الهلاك منجا
تكون حانت مواعيدك .. يكون وقت المطر قد جا
شرق ضوا البلد عيدك .. وطابت نسمتو العرجا
نكون يا طيبة تمينا .. وبدينا ولفنا .. غنينا الغنا الراجا
وبدت كاس المودة تلف .. عشق من حلفا لي راجا
ألف في ألف .. حبابك ألف .. إيه يا عنزنا القرجا
يا لبانة في الزمن المراحو نشف ..
يا جبانة للخوانة .. للعوج البدور ويلف
دميرتنا البتروي جرف
ضفيرتنا وعرش بيتنا .. تميراتنا اللي كانو وقف
أصابعين الرجال رصاص .. صمغ راس البنية سقف
تكون دارة الزمن عمرت ..
نكون لمينا في الفاتو وتكون فاقت ملامحنا وتضاريسنا القبيل غمرت
دغش ساقت بوابيرنا ونجت شتلات بعد ضمرت
ضراعيك يا الولد كبرت .. مراعيك يا البلد كترت
خدار .. خدرت
غزار .. غزرت
نضاراً زين
برغم الصيف وصناتو ..
وسموم البين وأناتو
عصافير الجلد قدرت تباصر غيمة منتحرة
تضاير نسمة مندحرة
تضاير الغابة والصحرا
من الغمة وضلاماً شين ..
ومنك يا دقين ننفك .. تكون فكت عقدة الدين ..
وعقب سيرة البلد سارت على الدرب العديل والزين
بعد ها الحال بلا مرسال .. يجو العمال .. يجوز الزراع .. يجو الكداح
يجو الناس البخبرو شليل .. وشقيش راح
وقمريتين جناحن دلّى فوق الصاح
من الغفلة وعساكر الليل .. ولي الدنيا الجديدة جناح
صباح نندلّى شدة حيل ... بلدنا وما بنقيف بين بين
فيا خيالة عدو الخيل .. ولي الطيبة البتملى العين
مدى وتياه .. في حز القلب غنوة وآه
حنان بلدو .. وحنين منفاه
يا بت العز .. يا بت الجاه
يا هسع دية .. يا بكرانا .. يا ماضينا .. يا بعدين
نكون كنا .. وبقينا متين
وكيف تكدح مواعيدك مواعيدنا ونساورك وين

عَبيّت زُوادتي الرّيقة من بايت القَوَى ..
بايت القَوَى الوطن الدّشَرْ ...غيمو الرّبَطْ
ساعة بقينا من الرّوَى فرسخ مطرْ
سافرت ليك بأشواقي في كل المنافي ..
بَحّتَّ في كل المخافي ..وكُسْتَ عَنِّك في الخُرَطْ
في التواريخ القديمة .. التواريخ الرؤومة
بين رموز نبتة ورسوما
في الطّنابير العظيمة
وبين لُغة مروي القديمة
راجعتَ بيك كل الاسامي البعرِفا
كل الُّجمل .. حتى الضمائر واحرفا
صححت بيك زمني الغلطْ
باخَتّبِكْ قلبي الشّقِى .. وبشرتو بي لُقْياك عَبَطْ
يا طيبة زي شارع وَسَطْ .. يمشيبو كادَح وارزقي
وممتنعة زي قبض المياه والمافي والما بتلقي
غالِبني جيتك اصادفا
لا في المعابر والموانيء المترفة
لا في المطارات الوسيمة كما الفراغ .. لا الارصفة
كل الدروب التعرفيها وبعرِفا
التألفيها وبألفا
خَشّيت دغيش سِعْن الدِّني المرفوع على سِيبات وفا
رَوّابي كان قُطّاع غني .. وشوقاً مَفورِن وانكفى
قِدّام خُطى الوجد الِحفى
غابت صباحات القُرُب وبَقّت ضلامات الجفا
و ضَي المصابيح الجريح .. كِترْت علي الرّيح وانطفا
هوي يا بِنيّة من الغُبُش .. من حر أباطهم مُترفة
وين انتي شان نرقد قَفَا
وين انتي وين .. ما بيننا بين غيبتك كفى
لو بَقّ حِسِّك في هشيم دبش الضياعات والسأمْ
زي أغنية شوق زي نشيد اندبّ همسِك زي نغمْ
او خبّ خطوِك زي شهيد .. رَفّتْ مسيرِتِك زي عَلَمْ
ما كان مهابات الصقور (نخّت) تحت رخّة رخمْ
وين انتي وين ... ما كان هجم ديش العجم والدِّنيا ضو
وامسن سبايا الاغنيات العُزّل الآه شِنْ تسو
لافي الكفوف الخاوية سيف ... ولا في الكتوف الزاوية ضو
دَلّجتَ درب الاربعين .. صاقَرْ قوافل الرِّق .. حِفيت برّاً وبحراً حتى جو
اشريكِ قُلْتَ من الزمن واعتق معاك رِقّة مشاعري ازوِّجك كل الوطنْ
كل الرِّجال الحملو ارضك بالحلال ... وافتق سحاب العشق شو
ولا بنتي في الزِّنج البجم ... لا كنتي في العرب الأشو
لافي شلوخا .. ولا الوشم .. لا في شيوخا ولا في عو
بل فيكِ غشّاني الزمن ادّاني صرصر وبعتو نو
انترتَعَت رؤياي .. هَكَعْ .. ما بين أريت يا ام زين ولو
وبين تبقي وين .. لاكْ في الوجود لا في العدم
لا في الحقيقة ولا الوهم
لا زين لا شين لا البين بين .. يا راحة الباقالو هم
لا عنك افتاني الزمان .. لا منك انقطع العشم
آ ريتو اغناني الكمان يا طيبة عن صوتِك نغم
من أعلى ميضنة فيّي كان اعلنت موتك للأمم
أو صِحْ بجيتك لى الرِّمَمْ
لكنو صمتك طال وكان ميعاد زفافي على الألم
قلت ارفع ايديني واقول ... خاني الصبر .. خان وانهزمْ
زي ما انهزم كمين نبي وخانت على التاريخ ذِممْ
يا طيبة اخافك واللاّ اخاف السُّبة واللعنة الوبيلة
تحل وراي كما الجفاف أو..... تار على اكتاف قبيلة
معلم الله من عتاد .. يبرد حشاها ولا في حيلة
يلاّ نأمل في البُعَاد سنين ودنين طويلة
وكيف وكم
والإنأخد بالدّم غَصِب ... مافي البرجعو إلاّ دم
يا طيبة هيلة .. سلام عوافي
أيا بديلة عن اللِّي مافي
يا أدخلي على غُنانا .. يا أمُرقي من القوافي
يا أحذرينا وما تخافي
وما بنخيّب حاشا ظنِّك ينفخوها وما بتموت
حية نارِك ... حية يوت
خُتِّي قدرك في الأثافي .. يوسف الفي الُّجب يمرق ضاربا ريقة اليلقى قوت
روقي كَنِّك .. واللا كَنِّك .. تاوقي في البحر الخرافي .. يونِسِك في ياتو حوت
سَمّ ينده جوفو حافي .. وهِّطينا على الأثافي.... وهِّبي نارك لا تموت
يا حمامة غار محمد .. يا خيوط العنكبوت
يمة كسناك ضمة مافي .. الدروب وين غيبنك ..
في سؤالنا الضّارِي عَنِّك سَدّن ابوابِن بيوت
والبيوت البشبهنك .. انكرننا وانكرنِّك
ننفضح لا لوم عليهن .. بس ها كيفن يسترنِّك
في سُكاتنا الجاري مِنِّك
رحّبنْ بينا السجون والبيوت الماها منك
الدرادر والمنافي
فينا مَنْ روّح فدايتك ..
وفينا من لا زال ... وفينا مافي من بدّل لرايتِك
وانتي في ذات السكون
التراب يتشهّى حِنّك .. السحاب عابر يفوت واللاّ يكمُد للعيون
بالغبار غُمّة وسوافي
وانتي يا آخر المرافيء
يا ام وجوداً بات خرافي
في صحاريك داخ غفاريك من برد زمنو الرِّعافي
دون كواريك .. مات واتاريك غبتي بي كل المدافيء
يا لساريك لاك موافي
ولا كمان قادرين نسيبِك نمشي في الزمن المجافي
وما عهدناك عاد تخافي
لوحة التاريخ بيشهد لونا والدّم الإضافي
الاّ يا وتري وغناهو ..
يا نبي الثورة الغشاهو برداً أكتر من غُتَاهو
الاّ يا بِتْ جاك زمن لابس الأيام قُلُب
الدّفاتر والكتب
إستحمّن بالغلب
التلاميذ النجب .. طيشا الفقر .... الغبينة
صنّت الأجراس وجينا
إلاّ يا أخ ما لقينا
الجوامع مستباحة .. والمصلّين صَرْ جُنُب
والكنائس جالبا دينا
والمدينة تبيع عوينا
لي النخاسية الغُرُب
واللُّحاسية وعُقُب
تشتري افلام الرُّعُب
والهتافات الجُرُب
عربدت باسم السّما .. توّكت ريح السُّحُب
وكل أطفال الفقارى .. فضلتلها فد شُخُب
في الوقار الفاوه سُبْ
واللاّ اريت ما كُنّا منك .. واللاّ بيناتنا القُرُب
كنا اقلاّ نشوفو عادي
التردِّي الجاي وغادي
سادي في النعم الزيادي
وابن ادم بالايادي
لى سترة الحال يكافِت .. غابة غابة .. ووادي وادي
ينبح المسكين يا طيبة .. طيبة يا راحة الفقارى
وواحة الفي الصّيْ حيارى
عورة الشُّرفاء الفقارى
وسترتها ولُب المباديء
يا بنية الأُجّر ام خير ..
أو نبية الشجر الطير ..
يا رسول البسمة للاطفال بشارة نيل بلادي
يا طليقة الغيم عروس طين البوادي
المناديل بانتظارِك والايادي
معبّا شوق .. يا طيبة .. طيبة .. ولا حياة لمن تنادي
بُكاك بكيتو .. سَكَتْ برايا
كنت حافي على إبر .. بِتّ حابي على شظايا
من كُتُر تعباً تعبتو .. قلت ألقاك ما كفاية
يا أدوب بالمرة بينِك .. يا أكمِّل فيك غُنايا
انتهت كل الخفايا
انتهت كل المحاسِن ... رُحت اكوسلِك في الخطايا
لمّا في ذات لقيا حِرْ .. وزاد هواكي على هوايا
وقمتي خنتيني معايا
اشتكيتِك لى القمر
لما انسام السّحر
الرياحين والزهر
شهدوا ليّ عليك يا اخيّة
القمر سوّاك بريّة
باعتزاز بى نبرة حيّة
صاح في جمعنا يا بريّة
من يكن من غير خطيّة
وقُمْ رميتِك باللِّي فيّ
من المحبة فيا وفيّة
يا معاكي تغيبينا .. يا تعالي وابقي جية
للبعيشو غَصِب عشانِك والبموتو بحسن نية
مُرْ علينا بعد طراوة وبين عيون احباب تقية
نبقى في كتمة وشقاوة وبين عساكر وارزقية
كفاك شكية
يا التّشرِّكْ لي غمامك وتحتَك الانهار قوية
ما انسرق بالليل سنامَك لو قبيل كُسْت الحوية
كفاك شكية
وما بيضيع حق لا قضية
لو في طُلاّب من وراهو ونية بيضاء وبندقية

تستغرب يارسول الله
يا أول وتانى الخلفاء
تستغرب يا أبذر لوجئت فى هذا الزمن الجهجاه
لو فيكم حد يا حنفاء
إتجاسر وقال ما معناه
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء النار وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسو أقلاه
السيف فوق راسو مخاواه
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا يرجى الراجا
يا واقف فوق عمق الدين
يا شايف لآخر دنياه
يا طيب يا ابن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا اب دقناً شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
ده الدين .. المقلعة ده الدين
والمزرعة من فضل الله
سال سيفك داقس شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا انتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا أمين
بتحلحل دين الكنتين
تنلفت كايس لي مين
الأمن محاكم التفتيش
وأصحابك جوة زنازين
واسيافن صقرو مافيش
ما انبعنا وباعتنا قريش
لأمريكا وبي حبة عيش
والحاكم قبض البقشيش
سال سيفك داقس شقيش
الأمن محاكم التفتيش
جنسيتك .. بظبورتك .. الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقس شقيش
إتراجع يا ابن الغبراء
يا صاحب النفس الأمارة
بالثورة القادرة الجبارة
إتراجع وانسى الفقراء
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفسك يا أب ذر
سيب خونة مكة وتجارا
إتراجع يا ابن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
اب ذر .. لا سمعني ولا تبعني
طبطب على همي بيسراه
وكان دمي إنمازج بدماه
بي دم الغبش الشهداء
من أول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
واسلاماه .. إسلاماه
كانت هي الأخرى ورا القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين بكماء

قوم صحي نضال ... عمال البلد أم خير يا خالْ
صحي الكُدّاح .. الوين ترتاح .. والحال بطالْ
صحي التربال .. والأرض الطيبة الكم خاواها وضادا النالْ
اليوت شغال في نهارو وليل ... منهوك الحيل تحت الراسمالْ
آه الراسمال الياما قسى وعوّق رجّالْ
ما خّلا نساء .. وعرك الأطفالْ
لا مسلم قال .. ده آ خيي بلالْ
نصراني يحن في قبريالْ
لا يمين في يمين ... لا شمال في شمالْ
دولار وريال ... دوار يا خيالْ
تجويع وإذلالْ
خرّب واغتال كل الآمالْ
ما تخلي مجال دون إستغلالْ
السلب حلال .. النهب حلال .. والصلب حلالْ
هدِّم لذات المسهوكين من أجل الذات .. مكينيزم انتاجْ
ابراج العاجْ
هيصة المكياجْ
ديباج التّاجْ
السيخي الصاجْ
زي اعتى سياجْ
يتلقى افواج المسحوقين في الليل الدّاجْ
المسيوقين تحت الكرباجْ
اخوان اصرارك يا حّلاجْ
على انو الليل بِلْد الفجّاجْ
وضربة محتاج في نهاراً ساجْ
أبتر من سن سيف الَحجّاجْ
الله يا الزول الساقو عُزال
اطرى الإذلال يا دغري عديل بيصارع الويل حيّاً ما زالْ
بالصبر يشيل في الما بنشالْ
ما انيقّن وقال يا دنيا محال ينصلح الحالْ
بل عبّا وشال جواهو الفالْ
نازل وديان طالعبو جبالْ
أشواك ورمال غابات ووعر .. بين ريح ومطر .. عِرْق الشّلالْ
ومطّامِن بال .. ما لاوز قال يا ربي أصد من دربي الطّالْ
ما طال لا بد يشرق بكراهو الما بنطالْ
يشرق بالخير .. بالحب .. بالود .. يشرق لا بدّ يضوي الحَلاّلْ
إزي يا خال ... كيفنو الحال .. زين عال العالْ ؟؟؟
مع انو الحال ما راجي سؤالْ
ايجار البيت ... جيهة الأطفالْ
مشهاد اليوم عيشة الدوبالْ
أفراح العيد على روحو وبالْ
عكّر لي الفوق أداهو إذلالْ
والخوف ام زين ان صابا زلالْ
الله يا زول مشغول البالْ
في الدنيا يكون ما في استغلال
والشوق رايات ... الله يا زول ... الشوق رايات
والله على ناس كلها احساس ..
انو الجايات اجمل والفات ما فات والفأس
والارض البكرة الفكرة .. الراس
الختة اساس الليلة وبكرة .. اعظم ميراثْ
أجمل من ده واعظم بكثير ..
عالمنا يصير ما فيهو اجير..
لا ناس فوق لا طيطي راسْ
يبقى المقياس الشغل التام بي وفا واخلاصْ
الخاص للعام والعام للخاصْ
والشوق قدام .. الشوق قدام ...
والخوف ينداس تحت الاقدام ..
كابوس البؤس نلقالو خلاصْ
اصلاً يا خال ... شفقة راس مالْ
اما العمال انفاسا طوالْ
وان طابو نفوس .. ان طال البالْ
ضي الفانوس بيكفي جبالْ
حدك يا رصاص .. ما دارلو دواس ولا حتى كباس
عالم كالشوق وحق كل الناس
الا الكداس .. عاكاس .. عاكاس
شان دفتر شيك بسرق كراس
واحنا الوراث كلنا حراس
والجاي يدوس عزنا بنداس
اصلو السواي تب مو حداث
يا حب إنداح على كل قليب
إنزاح يا نواح .. دندن يا دليب
بأغلى أنغام .. ويا خطوي ارتاح على أحلى دريب
قدام قدام في امان وسلام
يا عالم كون بالود مسكون ... قوام قوام
قوماك يا خال .. حلاّل حلاّل .. باشواقنا نطوفْ
الدنيا نشوف اشجار الفال الدانية قطوفْ
شان يربى طفل لا غم لا خوفْ
وإن قالا بِغِمْ ما يلقى دبيس لا هملي وهم
وخاطر مكسوف ينعشى يبيت على صوت الأم
شان باشي تعم
من بيت لى بيت ... يا بكره يا ريت ... غنواتنا طُعم
والعالم خيط .. والقابض كان ذات مرة حلم
والرامي انسان ما انيقن شان الدنيا زمان قالتلو أبيت
ويا عالم كون بالود مسكون .. كون حُرمة بيت
رَتّاي وحنونْ
ويبقى الدناميت من أجل طريق يمشيبو دقيق أو قطرة زيت
للصابر فوق ما فكّ الريق .. يا سابق الصوت من تنزل موت يا ريت خبيت
فوق كتف الشوق لى حال مفتوق بي إبرة وخيت
وعلشان ده يكون .. قوم حييّ نضالْ
عمال البلد أم خير يا خالْ

سلام ما سلموا العبّاد أواخر الليل قليبن حاس
سلام والفيها شن بوفيها وإنت حجابي والوسواس
سلام ما خشَّ خيط النور على إبر النهار ومقاس
مشاعر قلبي عند زرزور يلاوي الريح بلا أنفاس
يلم الصور يسوِّي قصور وما من خرطة ما من ساس ،،
يسايسوا الريح ، يساومو صريح ، مع إنو جريح ،وما ينساس
سلامات يا أحنّ الناس
ما قهى القمر مبهور مع الوز النزل رقاص
وبين الصفقة والطنبور جزيرة غزيرة بالإحساس
بلدنا متور ومو عتمور أرضنا قريرة مو حصحاص
إذا إنسقت القلوب البور يشب شدر الولف ميّاس
ياالجرف البعد عشرو ودبش وكرو وشدير الفاس
نزل بحرو الطلق ضهرو ، وفتق ظهروا الحلو الأنفاس
سلامات يا أحنّ الناس ..يا درة ، قانقوليس ، أناناس
سلام والغربة لافي مدر فكر تحراها لاب تنقاس
قدر والفيهو ما كسناهو وين بعد الوطن بنكاس
يا حاحاي مسور الغير مسورنا الطير عليها كباس
سمانا شتا وهجير مطِّير بحرنا يحيِّر الغتاس
إن قلت النخل في نوري جنة يقوقي فوقه دباس
وإن جيت للسهل باللوري تسري ليالي لا آخر كاس
خيرنا كتير وكان بيطير دي عين والله ما هو يباس
إحنا أسياده وإحنا بخير ،،، ولا تقولي الزمن عاكاس
تمرنا ولا حلاوة الغير فقرنا ولا غنا الإفلاس
دلقاً بالعرق ينبلَّى يلبك في الضهر والراس
ضارب في الشمش ينقلَّى أرفع هامة وأحلى لباس
ولا بدّ الشبك تنحلّى يوم الناس تقوم هي الناس
والينعلَّى ماب يندلَّى لا ننذلّه لا ننداس
يا رسن الأمل عنْتِلِّي ساب الحلي ركب الباص
وين يلقى الأهل والخلِّي لو لمَّ الدهب والماس
يا عنتلي كان ودناس
كان سواي وموحداث لي ضهر الحبيب حرَّاس
ولي أتر البغيب قصَّاص تقلتو تخفف البكيات
تتقل خفتو الأعراس
نفير للقلي وحدو نفير لمينة بيت مرق رصَّاص
كان عنتلي ، علِّي آناس
وكت ضحكةْ سترتو بكت
سكت منو وليه كان ونَّاس
صحينا مع الدغش ذات يوم تبنا رقابنا ما من راس
حطب حتى الكلام ده حطب ،، حطب والحاطبو داسْ الفاس
تعب حتى السكات دا تعب 0000 تعب والتاعبو حاس الساس
يا عنتلِّي بير الحلي صد للحلي يابسي يباس
ويتلفت تميره تملِّي ماك واعد الصبر بي راس
روقي عيوني لا تنبلي بالدمع 00 الدمع منقاص
لي صبراً حبيبة فضلِّي ،درَّابة وبحر تنماص
صلِّي على البلد بعد الله .. صلُّوا على الحبيب آناس
سلام لامن نلم يا خلة في الحلي الحنيني خلاص
عليها سلام سلام وسلام .. سلام عَد فيها من أجناس
بلد ما فيها أيِّ كلام بلد بالصح بلد بت ناس
إذا ما أذَّن الآذان .00. إذا ما رنت الأجراس
سلامات يا أحن الناس
سلام لامن عشم في الشوق يلمنا نحنا ياك وخلاس
بلدنا متور ومو عتمور أرضنا قريرة مو حصحاص
إذا إنسقت القلوب البور يشب شدر الولف ميّاس
ياالجرف البعد عشرو ودبش وكرو وشدير الفاس
نزل بحرو الطلق ضهرو ، وفتق ظهروا الحلو الأنفاس
سلامات يا أحنّ الناس000يا أبنوسة قانقوليس , أناناس
سلام والغربة لافي مدر فكر تحراها لاب تنقاس
قدر والفيهو ما كسناهو وين بعد الوطن بنكاس
يا حاحاي مسور الغير مسورنا الطير عليها كباس

زمان الضر .. كل البلاد أم در .. والمهدي حي ما مات
الخطوة في الشارع منبثة ثورية
بق الغضب طالع .. أبرول وطورية
شافع ورا النافع .. طلبة وأفندية
الجوعو كان دافع .. لي هبة شعبية
ما الصبر ما نافع في أيام كركية
ذات وضع همباتي .. وأحوال متل دية
كهنوت وجهدية .. وكابات هي ما هيّ
وحموني اغرودة والدنيا عيدية
وحرموني زغرودة في فرحة عادية
حظروني من عودة .. أو مرقة ليلية
منعوني من ذاتي .. واخواني جندية
للقمع يوماتي سدوبا وردية
شك في هوياتي .. فتيش وسخرية
لكناتي .. لهجاتي .. شلخاتي .. عينيا
أوكير وحمداتي .. باعوضة سل فيا
تحتاج معاناتي لبطاقة شخصية !
يا مسخ بعاتي .. وقام لجنة شعبية
لي حضرة الآتي .. شايل الفرح ليا
عبيت مساماتي .. من غيمة منفية
وعلى أرض مأساتي .. فرغت ما فيا
وضل الوطن شاطيء .. وشمسو المراكبية
النيل ديمقراطي .. القيفة جمعية
بردت غنواتي .. بي نمة مغلية
بقت هتافاتي .. دوديتا بي إيديا
في دقن همباتي .. وعسكر حرامية
طارت حماماتي .. وركت سلامية
غدروها شماتي .. وكتل الرصاص فيا
لكن يا مواتي .. يا ذمة مشرية
يا عسكراً فاتي .. مافيا وطفيلية
من شرفة الآتي .. وبي كل حنية
أخدني أماتي .. بي طربة أمنية
ربطن لي جرحاتي .. وبي ( ) واغنية
سدن لي آهاتي .. فوق وقفة صخرية
سنن لي إيديا .. وصاحن بي صد صارع
يا عيش وحرية .. وانغير الواقع
يا ميتة دغرية
نار التكل ماتت .. ونار فينا شن حية
روحك إذا فاتت .. روح الوطن جية
.................
أماتي يا أمات .. كل الغلابة الجات
من حلفا لي نمولي .. من بارا لي سنكات
غضب الخلا اليغلي .. صرصيرة الغابات
في جيب ضلوع النيل .. جيب القلب غيمات
أشواقا تالا الأرض .. والأرض شوقا نبات
أماتي يا أمات .. ود الحياة الصنديد
قولاً لكل عنيد .. وصاحب دقن همبات
قولن له نحنا حديد .. زي المرمة شداد
اللي ضميمتو يخون .. ما أمنوهو بلاد
يا مستبداً بات .. حارساهو دبابات
كضاب وكضابات .. هواب وهوابات
شن حزبك الويحيد .. وضراعاتك ام حجبات
طظ .. جبهتك وين سيد ... الإشتراكي الفات
لا البوت ولا النبوت .. لا التوت ولا الكهنوت
ونقل الفلاشا أفاد
وكان يحكمونا بيوت .. لو بحكمونا أفراد
حارسين حديد الموت .. والبعث والميعاد
كل لحظة روح بتفوت .. وكل لحظة كم ميلاد
وعلتنا يا مسخوت .. مو اسم الله واحنا عباد
علتنا كيف القوت .. والجيهة والمشهاد
ما مر قطراً توت .. ما طل للبراد
الشغلو كلو زيوت .. ما يلقى زيت لا زاد
..................
ما يلقى الطِّري .. وضاقنبو السبل
العجل العري .. النار والبقل
خيري وسكري .. يا الدقن ام قمل
شيلي وصدري .. وجيبي دمار دبل
زيرو لبشكري .. شامبو دلال وفل
غني وشكري .. يا كوز المثل
في الضيق منهري .. وحمدك الربل
بت السمكري .. جيهتك للرجل
دهناً كركري .. الطلح الكحل
هوي يا العسكري .. غيرك من قبل
عامل فنجري .. وفاكر الناس هبل
باسم الدين يطل .. وبى أسمى المثل
يرغي وينفعل .. ضاحك بالعقل
ما داعب طفل .. لولا وقالو كل
ينفرطق نعل .. في المرة والرجل
قاصد ننشغل بي سنن الغسل
عن موية وأكل .. لا توب لا في ضل
نقعد ننكتل .. في اوصاف الرسل
مين برعى الإبل .. وتبرا الغيمة ضل
والمن دوب طفل .. يفتي ويشفي غل
والوكتين يطل .. يلفح للعقل
حيلتك ما بتحل .. في فكرك عطل
زهدنا فاض فضل .. وما ناقصين مثل
وين يوجعنا وين .. ماك داريبو كل
ما شعنف دقين .. شنف حالنا ذل
عيشة يا مفتري .. ويوم كامل شغل
نسرق ننكري .. واللا بلاش تكل
غني وشكري .. يا كوز الدبل
زيرو لبشكري .. والآية بــ رطل
بس يا عسكري ..
...................
يا عسكري التالفين .. ويا تالف العسكر
يا لايصاً في يمين .. والشعب قد أيسر
ما جف ساق ابريل .. اكتوبر الأخضر
يات شيمة ليهو تشيل .. كل ما الرياح تكتر
فرعو الهطيط بيميل .. بس ما بينكسر
يتسامى دغري عديل .. كلما الرياح تكتر
طير الخطى الجايين .. ما بتفزعو الهزات
لا صقورك النازات ..
من دم رعاف الطين .. ودنس الحياة ام لذات
فاكر رقبتك مين ... وفاكرنا مين بالذات
دي القرشي .. قاسم أمين .. ويا دا الشفيع ما فات
وما اعظم الجايين .. يا اتبره وجايات
حاضرنا ما بنميل .. وكل الدروب صاحيات
يا لابساً كم وش .. على مين تدور وتحوم
شغلك ضلالي وغش .. نضمك عسل مسموم
قاصد عيونو تتش .. ويرضى البلد بالسوم
طفّت جبهتو شمس .. طارت في راسو دموم
الجاي بعدو يمش .. يعتب بعيد مكروم
تطفش طيورو تطش .. وبومك يعشعش فوم
يا ضاحكاً غياظ .. لي شعبك المأزوم
ظنك ليالي حراز .. ما زلزل الخروم
في مزارعو .. لافي رذاذ .. لاغيمة طاشة تحوم
لا زيت ولا أمباز .. قفل مصانعو عموم
وانعكنن الإفراز .. وقد بلغت الحلقوم
وبرضك تنوني وراز .. ما بنقذنا منك يوم
بيناتو نمشي عزاز .. زي النبي المختوم
يا ضاحكاً غياظ .. لي شعبك المأزوم
من دكة التلفاز .. دايماً تطل ملخوم
وانطاير الإنقاذ .. وزبدك يرك مزخوم
عرب الكنانة حجاز .. مستقبلن مهموم
عشمان في كوتة جاز .. عربونا كم قدوم
من لذتك تنحاز .. مع غزو ما له لزوم
كان ماك نتن لزاز .. فتان ولخبات كوم
من هزتك في عكاظ .. شعب الكويت مو الروم
لا قصد لا عكاز .. وقت الدميرة تقوم
لاك نافعاً حجاز .. وشن العتاب واللوم
فوق العليك لاواز .. تشهد سما الخرطوم
غماز ويا لماز .. هماز ويا مفطوم
ما الفرق بين ملوك .. كادة الرعية تلوك
وعسكر وراهو بنوك .. ساوا الغلابا حنوك
طول النهار عوك .. عوك
والليل تراب وصكوك
تملا وتفضي شروك
وتملص ضميرا هنوك
واسترني يا المبروك
متل التكني أبوك
لاف بي أخوي وأخوك
لا اخلاق لا دين لا سلوك
يرمي الولد في الشوك
أما البلد مشكوك
يا شعب يسلم فوك
عطفك رضاك وعفوك
قول للخزين صل صوم
ولا تنكسر مهزوم
ولو فضلت الخرطوم
من تصحى قبل الطير
بعد النجيمة تنوم
ومن عاش يا طيبة بخير
مكسية راجية اليوم
ممنوع عليها السير
غير لى كبار القوم
والسادة الأمجاد ..
لابد من يجي يوم
ساعاتو ما هي بعاد
يجي من ضراع عباد
من غمة حق الموت ما لا قي وانتو سعاد
قول للدعي المتخوم
يا مكفن التفاح .. وشغلك قيافة ونوم
في شعبك الكداح .. وأطفال مو لاقية الدوم
يا أرزقي ومرتاح .. ما جابهنو هموم
جاييك زمن كتاح .. جاياك رياح وغيوم
جاياك صخور الصاح .. جاي الصح المعلوم
من كل فج في كفاح .. تتوحد الخرطوم
البيننا بينك دم .. تاراً غريق وجراح
فينا البحرقو الدم .. فينا البكفو سلاح
شهدانا ما قت كم ... لا ياتو فيها فلاح
لا ( ) شلت الهم .. يا جني يا سفاح
لا الإندلق بنخم .. لا بتتوزن أرواح
ود الفضل ما راح .. وما طال فينا شهيد
عصيان وإضرابات .. ما بنفع التشريد
لا بجدي صالح خاص .. لا مسخك الشعبي
وغنايك الرقاص .. لا دفاعك الحزبي
لا حيلة ابن العاص .. لا السجن لا التهديد
يابوس بلاد الناس أشرافها ما بتنداس ..
ما بمشي فيها وعيد .. فيها الوعد متراس ..
فيها العشق صنديد .. وفات أعزلاً دواس ..
يا أرذل القاعدين .. يا أبخس الأنجاس
وسع مجاري الدم .. زيد السجن ترباس
يا هالكاً مجراس .. ما اسباب ( )
( ) خازوق بني العباس ..
زي ما انت عندك دين افريقيا ليها تراث
وكان تنهري وتنغاظ .. عبداللطيف الماظ .. ما حرضو النخاس
........................
يا رباية المنظمة .. المريبة المسجمة
دي البلد طيبة ملهمة .. ما بتزور ملاحما
كنتِ خدرا ومنسمة .. جنة طيبات مواسما
يا ارض جاك مسيلمة .. في ايدو كيزان مخرمة
فاضية فاضية ومعلمة الله من ( ) والحمى
بين دهاليز مضلمة .. وبي مراويد مسممة
تشتك ليس مرغمة .. يا أرض صابك العمى
وكل شيء طار السما .. إلا المطر طار من السما
وما اكتفت تب بانعما .. دكن السفة دردمة
وقال نشرع نأزما .. وفي البداية النقسما
ويا كضب .. لا بتقسما .. لا بتقدر تأسلما
ويا كضب .. لا دا بلسما .. لا ترابيك مرهما
كلكم ملة مجرمة .. والبلد في البيكرما
في الغلابة المنظمة .. في نقابات مصادمة
أو جماعات مقاومة .. من خصوم المساومة
واللا أحزاب منظمة .. سلطة الفرد تهدما
من أساسا وترايما .. والبنوك المرمرمة
من عرقنا ومخمخمة .. مافي خير غير نأمما
إلا وجعة ملاحما .. الغلابة المألمة
تنزع السلطة بالدمى .. وأي ثورة نقيما
الكروش المنعمة .. كف تلملم تخمخما
تصحى ذاتا المرخمة .. وللعساكر تسلما
دايرة فعلاً مأزمة .. إلا لابد لازما
يا الغلابة المأزمة .. دي التجارب تعلما
من دروباً نقدما .. والديمقراطي أسلما
هو البوضح معالما .. والمعالم تفهما
إنو سبة مظالما .. في الارض ماهي في السما
ولو دي أصلاً عوالما .. يبقى في خيلها مكرمة
ولو دي أفضل عوالما .. يبقى غييرا لازما
وحين تلملم عزائما .. غيرا ما بيبقي حاكما
شعبنا وفارس الحمى .. ينفرد بي ملاحما
تصبح الدنيا سالمة .. والخلائق مسالما
الحبيب للحبيبة ما .. للعساكر نقاسما
شعبنا وفارس الحمى .. ينفرد بي ملاحما
الحبيب للحبيبة ما .. للعوارض يقاسما
..................
منك براء .. أديت إيمانا والإخلاص
يا أم بنوك العيش .. يا أرزقي ولحاس
في كفك البقشيش .. وايد تمشي للحراس
يا كرشك القدر ايش .. واكبر فراغ الراس
ماك جايي ( ) ايش داعي الهلاك للناس
هن داعي للفتيش .. حالة الطواريء وفاس
حظر التجول ليش .. وليش كتمة الأنفاس
وليش جايي أصلاً ليش .. يا جايي من غير ساس
ما قابلك شقيش .. جوة القطر .. في الباص
حال حلة تشكي دغيش .. ما عشتو في الإحساس
لا جُعْ لبست الخيش .. لا سهدك قراص
أطفال حفايا تكوس .. للموية في الحصحاص
يوم ما لبست البوت .. في هيصة الأعراس
تعب البرد والصيف .. حمى الجسد والراس
طيب حا تقدر كيف .. تلمس قضايا الناس
نار المدن والريف .. الحمى ما بتنداس
كم ( ) والأقوى منك فات
فاكر الحكم طرطيش .. والسلطة قوة راس
فتيش رقاب في دغيش .. حميس جهالة حماس
أو ( ) رقصة يا درويش .. عليب بخور ونحاس
ملينا شعب وديش .. ملو الأرض والناس
الهبة تبقى بشيش .. والحيطة من فد ساس
ديل يا الحرامي بريش .. ( ) حلتنا مو ( )
دم اخويا مو معليش .. وانا ماني نايم حاس
وين تمشي وين شقيش .. اترك برا القصاص
واهلي الغبش ديش ديش .. وكل البلد حراس
ديل نحنا مانا قريش .. وماك ود اخو العباس
والشعب ماهو قشيش .. حالاً يصيبو يباس
وسوداننا ماهو حويش .. بيقفلو بي ترباس
اماتي يا أمات .. قولن لكل عميل على شعبنا وعاناد
قولنلو نحنا حديد زي المرمة شداد
وين تمشي يا رعديد .. وانا يا دا يا جلاد
جيت من قريب وبعيد .. من ادنى ( ) في الايد
( ) وآخر فرع غابات
نسوان عزاز وبنات
أجداد وحبوبات
جيتك بكل جنس .. أحيانا والأموات
جيتك بكل لغة .. رطان وصاحب صاد
جيتك هدير السيل .. مطراً بلا ميعاد
لكني ما جيت ليل .. جيت في الضحى الوقاد
وما فوقي إلا ( ) ..
وما نحنا إلا ثبات ..
وما في إيدي إلا ( ) شعباً جنا حوبات
وين تمشو يا أوغاد .. خانت ثرى الأجداد

راجِع ...
لي بِيُوت
تفتح لِي أدُقْ
أو
ما أدق
من غير تقول
الزول مِنُو
ولا حتَّى
علّ الداعي خِير
لا مالَك
الجابك شِنُو
لي بيوت بجِيهن
في أيِّ يوم
إن جيتا ليل
إن جيت دغُشْ
طوَّالي
أدفْر الباب
وأخُشْ
مرَّات أضِيق
قاصر الطريق
من بيت لبيت
وفي بيتنا
كُرْبُشْ
زي نسِيمة
معدي شِيمة
لا أُوش لاكُش
خابراني
كلُّوب الفريق
زولاً رفيق
الليل
وونّاس الدُغش
لاقطعت نوم
النائمين
لا الباري للحيشان
تقُش
عند شُوفتي
تجري على هِدم
في محلها
الشوق يترسم
تنجَهْني
حتَّان بالاسم
تندَهْني
عُقْبان تبتسم
بسمة بنيَّات ناس غُبش
*** *** ***
هادي المخالِيق
مؤمِنا
بسماحة الدنيا
الِهِنِا
كم تأمنك
يوم تأمَنا
ولا فرقِ بين الضيف
وأنا
غير كم كليمِة ملوَّنة
بالإلفة ..
هلِّيج ..
اعتناء ..
هادي البيوت
مطمِّنا
ودايماً قريبِِة
من البعيد
ذي مو غريبِِة
على الدَنا
ماها المريبِِة
وماب تكيد
مفتوحه طيبِة
محاننة
زولاً يجيها
في كل فجر
ولاَّ إن يتم
كمين سنة
تتلقَّى
ذي أم الجَنا
وترشع سحابات المُنى
بالصحة ..
بالعز ..
بالهناء ..
ينجيك من أولاد الحرام
يحفظ
يغطِّيك ربنا
هادي البيوت
ماب تتلخِم في الحكوة
ماب تنضُم كُتر
لاها البتنصنع نضِم
شايلِة الفصاحة
من الطيور
اليُوت تغنِّي
على التُمر
ونور المهابة
من النجم
مطعُوم سكاتها
من الصبُر
بينا وحروف الأمنيات
الطيبة
ألف صلة رحِم
على رغم
آفات الزمن
الصُرْمَة ..
حافات الفقُر
وحش المقادير
النهِم
سيل المباهاة
المدْلَهِم
نبَرُو المواعيظ
الجهِم
من ناس كُتر
عن قصة النار
والقبر
في وضع أضيق من
جُحُر
والناس لو خارجين
لو كُفر
هادي السمر
ست الضراعات
الُخدر
عارفاهو من وين
جا الفقُر
والحال سِجِم
يا حكمتا
الزي كلمتا
المن خدمتا
واطاته واحدي
وفد هِدِم
أية غفير
فوق الحفِير
حقّاني
قلبو على الخدِير
حيكومتا
ماها البتتكلف
سُتر
مستورة خِلْقَِة
ودا المهِمْ
مفتوحه لي كل البشر
كل الخلوق
من طينَها بَسْ
كل البسيماتن
تبق
لو وش زماناتن
عبس
مفتوحه قلباً
كلُّه خير
شايل حمالتو
بلا جُرَس
مفتوحة كالفضا
للطيور
وبيُّوضَة
للصيد والتَبَسْ
لا طبلة
لا كيلون سويتش
ولا ترابيس
لا جَرس
لا سِلكِ شائك
لا ترَس
لا غفير
. تفاوضو
ولا حرس
لا كلاب تشمَّك
شم جُراب
فتِّيش وجَس
لا آه لا سِب
... ... ...
... ... ...
وناس سِتِّ نُور
كتلو الكلب
كتلوهو مجبورين
غصِب
ما من نياحتو
ولا سَعَر
ظنو الكلب
بين الفريق
حامي البِطَيْنِين
اللعِب
آخر الليالي
من البيوت
قافل الطريق
سادَّ الدرب
لأخواتها
قالت ست نور
مادام في أمان
والناس بخير
سَعَي الكلاب
في الحلِة
شر
هوهيوُا بعْزاق للأجُر
أحسن تعيش
بي راحتها
تمشي الجنائن
يا البحر
إن كان تطفِّش
للصُبار
وأب عفنِة
تشغل للورَرْ
الحلة يكفيها
الولاد
يكفي البهيمات
الجَداد
يكفي الطيور
الفي الشدر
الحله يكفيها
البشر
كان جاها شر
الحله يكفيها
الحصانة الفيها
مادارت كَجَر
حرس الزرائب ؟
شن فِضِل
فِطْن الزرائب
غير بعر
صنَّت شويتين
ست نور
شالت حجر
وجدعت حجر
جدعت حجر
وشالت حجر
وقالت -
قرايبها ذات ليل
يمكن يجوها
من السفر
أو زول غريب
حاربو الدليل
عابر سبيل
زنقُو المطر
يقصد رواكيبهم
جَوّر
أول شي
يتلقىّ الكلب
اللاب يرحِّب
لاب يبِش
وليشن يتورنا
الكلب
وليش الكلب
يبقالنا وش
؟؟ ؟؟
وكان الكلب
لازم يموت
الطفشوه حرن
يطش
وكان الكلب
لازم يموت
شـان المحنه
الفي القلب
تحيا
وخيوط زمن الوصال
لا تنسلب
لا تنقلب
ومات الكلب
... ... ...
وين يابيوت
عز البرود
ضمتنا كونية دِفِي
ومن لدغة الصيف
الغريب
قامت حواية
همبريب
وتحت القمر
حيشانا
قيزان السمر
تدِّينا
لمَّن نكتفي
يا بيوت من الخاطر
قُراب
ورهاب
رهابات تختفي
الإعتذارات
ماب تفي
وجيت مالقيتكم
ماها في
أبوابنا
مو صاجات حديد
يغسل
درابزينا الرزاز ؟!
حيطانا
مو أسمنتِ
وحجر ؟!؟
شباكنا
لا سيخ لا قزاز
؟!؟
يا ضو جماعاتاً
عُزاز
زي ماك بشر
مامنو شر
لِز الخشم باب
ما اندفر
فوق الدُقُل
قُصَّ الكشر
يا شيل حِطيبة
من الأرض
لا خوف
ولفِّيت
لا حذر
لي كلبةْ الكبِد
أبقى هاز
مفتاحنا
مُو أكتر
من كشر
ما أبوابنا
من شدر الحَراز
والحيطة أقصر
من وَصَا
قالوها
عند ساعة السفر
وكان القطر قام
صوتو راز
البيت دا بيتك
يا حبيب
أدخًل مخيَّر
وماك غريب
اتمدا في أقرب
عنْقِريب
مبهول في حوضو
الهمبْريب
النيمة
يا العنابة
ضُل
أغشى التُكُل
خرْمان
في شاي
جيعان أُكل
وداك التمُر
والزِير قريب
بايت من البارح
ملآن
راقد في صدر
الهمبريب
دُر تقرا
ديك كتب الولاد
قلَّقت
أو طال الرِجِي
كُورِكْ
نقولَّك
.. هُويْ ..
بُعـــــــــــــــــاد
رسِّل لنا
المرسال
نجي
يا
رُوق
بإحساس المحب
سيد بيت
وعننا ما ضِهِبْ
الهِيلنا .. هِيلَك
شِن ندس
ماطال
عُمرا ًيتحسِبْ
في ياتو بنكِ
وياتو عِبْ ؟
يات خزنة ؟
غير
خِزَن النفوس
الماهلِة
مفتاحها القلب
قول لأبن آدم
في بلد
طــــالت معاناتُو
وتٍعِب
سكانو
دايشين بالشرق
وحكامو
باشين بالغرب
إحـنا
اللي فاقدين
أيِّ شِي
في الدنيا
مالكين كلِّ شي
بالفينا
بالحيل
ودا الدرب
والتابع الصاح
ما ضِهِب
شِنْ الأفندية
الكبار ؟؟
خدم المرابين
التجار ؟؟
حشم المبارين
الكِجار ؟؟
الأرزقية ؟؟
كضب كضِب
أحــنا التعابة
ال بإختيار
صُرمتنا
ترتاح الديار
ينجمَّ بال بلدا
تِـعب
نحنا الطيابة
الصِحْ كُتار
نحنا الغلابة
أكبر حزب
لاب نتغلب
ولاب نتقلب
والتابع الصاح
ما ضِهب
يا ....
هرشة
.نفخه زيف
كضب
نحيا وتموت
عرشك
خيوط العنكبوت
قبَّال دا
هزِّينا
و
و
ق
ع
الأعتى منُّو
بني وثبوت
لا بوت شفع
لا أجدى توت
لا غرب
لا شرقاً نفع
لا رمِّي حرّاسة
ولَبوت
لا أحلام شمولية
زلوط
فطّيس شيوعية
وفزع
من حتَّى
صوت شفع
كَعوت
يا من قلع
للسلطة لع
تنجَى الغلابة
من الخزي
وشرع الله
يبرى
من الشِفوت
؟!؟ ؟!؟ ؟!؟
*** ***
يا واقفة
بين كهنوت
وبوس
خلَّى القلوب العامرة
بوص
يا الديمِة حاضرِة
كما السمح
مشدوهة
ذي أم العروس
الجايي لي خلقك
قمح
والما دخل حلقك
دا روس
وأنا ما شي باكر
لى نفوس
ناس
زي بعض
طوَّالي نحنا
معا بعض
ماب نرجى
عيدين الله عد
لا الطارقِة
من عافي ومرض
طوَّالي في
ندِّي التميرات
العرَق
تدينا خير
غير العَرق
قفازا عاد يطلع
حِفي
ويرجع زمان الحش
حَفي
نكرع شرابنا
أكان عكار
وأكان صِفي
ومن ها البلد
نقضي الغرد
جرى بالحراجل
دمنا
وشاهقين دخاخين
القرض
عاركين بصارات
أمنا
أسراع رِضي
وأسراع حرد
نحرد
أكان غبَّ المطر
وعاب البحر
ما أسقى الجروف
ومنو ميسنا
نرضى عن المطر
منو ميسنا
نحترم الظروف
ونقلع عراياك
يا بحر
وأماتنا جن
واردات صفوف
ربتنا العصي
والسيوف
بالسوط
وخبط الواطة
بالأرجل سوا
وطق الهوا
بين الكفوف
لو غاب ولد
فد حول
ومارجع البلد
فينا الخِفيِّف
يقفرو
ويجي بالجنا
العوعى وقلد
دمّاعُو
والحزن اليلوج
في عينيه
ترعة ودامبرو
عٌقب الجنا
المن طبَّ
حار لفَّ البلد
قصَّ وفقد
أول برد
بوّغ كرو
حاحى وحصد
جيَّه بنى
سوَّا السعد
تم المُنى
وضوّا الفريق
لآخر البلد
أسراع رضي
وأسراع حرد
حردت سعيدِة
عشان حِرد
في الليل سعد
صدّ الصباح
صيَّاحو صاح
ما الحوش بلد
هـ ــ ـوي يا قصيفي
الطانجي وِينا
الكور قبض
كانت سعيدِة
ورا المراح
قابضاله غرّة
وقانقرد
كانت في كيم
المستراح
كانت قعد
تبدِي وترايي
في قص جناح
الغرة
معط القانقرد
كانت ملعوتة
في صراع ما ليهو حد
فك فكَّتن
ساعة سماعه
الكيك قبض
حست براحة
وبارتياح
ومعا بعض
الغُرة مجروحة
الجناح
في سماها
سابقي القانقرد
قالت -
سعيدِة دي
كان زمان
"حُمد ولد"
وسط البطان
وطارن
على تمر البلد
وطارت قصيفي
على الصياح
كانت خفيفي
في لهفة جَد
جيدن قبض
الطير براحو
الصاح
يغنِّي
في أمان
بلا نفَس انقبض
جيت آسعد
همست بعد
رمت الشرك
فوق كوم
قرض
الزول بلا
تُكل الفزَع
فورن زبد
ويرجع
بلا صاج الشتاء
ال حالاًّ هبد
همست سعيدِة
سعيدي جد
همست سعيدِة
مع الصباح
خايفِة
الَحَرَدْ
أُومَت عيونن
لي بعض
أُومت عيونُن
بي وئام
ما ليهو حد
أقوى السلام
الدون كلام
لا إيد لا خد
…
…
…
والمنقد
المخدوم
وقَد
وأنا جايي
جيتك
يا سعد
لا طانجة
لا كوراً قبض
من قلدة دافي
ودمعتين
فوق شوق
خرافي
وبسمتين
من كلمه واحدِة
وكلمتين
نعدل عوجنا
ونتصلِح
نتصافَى
ذي الوردِ
زين
أصلو العوج
كانت فطين
ود خاله
جاب لها
توب زراق
وأنا قلتَّ شين
توبك يذكِّر
بالفراق
توبك دا
حدت بو
الرضية
على الحسين
وانذكرت
ذاك الهدم
هدم الملمات
القراب
هدم الزراعي
من القراعي
إلى الضراعي
جري التراب
الماب يجم
هدم العقاب
هدم القضية
ويا صنب
ساس الصواب
ماب ينهدم
وانذكرت
حجج الرضية
مع كمندان القسم
تطراها
بي ذات الهدم
الحجي
في جد الحسين
سر الختم
ولاّ الختم ؟
سر الختم
ولاَّ الختم ؟
ولاَّ الختم ؟
حرَّ النضِم
مدت صُباعه
غصن جريح
هز إيدا
سوط عنج الحسين
رعشة ضُراعه
جُضُل في ريح
رفعت أباطه
إلى النجم
"الزول
على قرش
العباد
ليش ما يهم
وليشاً على نتش
البلاد
ديشاً نهم
لو بالمتاجرة
في الجهاد
من دون جهاد
لو بالمكاجرة
والعناد
أجر البلاد
ما تنحكم"
كانت دي
كلمات الحسين
ذات مرة
في ذات القسم
وكانت في اسم
وكان الكمندان
نص خصم
نفس الشي
قام خنس الكمندان
منقهم
لو قال بغم
في نقط نقط
من عينا أُش
مرقت تقش
مرقت تلم
دمَّاعه
بي طرف الهدم
كانت
وكت
دقّ الختم
لمحت
طرف حبرايتو
فوق كتف الحسين
المنهزم
وانذكرت

براءة السبحة والمصلاية والإبريق
ضرا القبلتان .. الصنة والقرآن
صحائفنا السماوية .. مواريثنا .. جوامعنا .. وكنائسنا
فقر شيخنا .. ونقود السيد المطران
براءة الكدح الصالحين .. من الفقرا الصح الزينين
جميع النفس ما عابت .. ولا خابت .. بإسم الدين
ولا إتغابت عن الجيران .. ولا خانت بيوت الطين
على الرسل الكرام الحب .. على الواقعين وراهن رب
عليهن حب من الرحمن
على سدرةً ضريحا يكب
سحاب الرحمة والغفران
آهة جديرة بالتمجيد .. وبي نعمة جنان رضوان
ولكن يابا يا سودان .. نحرقو حريق .. عدو الإنسان
في أي مكان .. في أي زمان
في أي قناع تستر جا
بأي طريق .. وتوب فستان
تحت يات صورة ما فرقت .. ولو كانت هي الأديان
شوارع بقتك مرقت .. عدو الإنسان .. عدو الرحمن
فلا ترحم ذمم حرقت تياب الواحد الديان
وللإنسان أخد تارك من السود وشي دارك .. شوا الأوطان
فمن شارك .. ومن بارك .. هما سيان
هنا الشرعية كيلتنا .. عدوك ما خرب الميزان
عرفناك للدموم حقان .. ولكن دمنا الترع .. يروح ساكت .. يروح مجان؟
ده ما ممكن ولا بيكون ولا إنكان
إذا سألونا عن كرري .. جسارة الماظ .. بسالات أربعة وعشرين
عن القرشي وصحابو العزل الطيبين
عن الدرديري والأنصار
عن أم درمان شمال وجنوب
رفاقة هاشم الحبوب
شفيع الأمة .. عن جوزيف .. عن المحجوب
دماء ماريل .. مشاعر جملة الشهداء .. المشو الجايين مدى الأزمان
إذا نشدونا عن من نفذوا التاريخ بريح الدم
عن القيلي .. وعن عثمان
عن الكدرو .. عن الكرار .. رفاقتو الجم
عن الفضل السوادو كتم
سواعدو ( ) صنم
( ) يا تم
عذاب السم
عمن صان كتالو على ( ) وقالا بغم
بإطمئنان نقبل وين من أنفسنا ونقع شقيش من الأوطان
وشن حا نقول لأطفالنا .. ونساءنا وجملة الحبان
يا مارق الدم من الموية .. يا فارق اليافطة من دلقان
أخد تارك .. تعلم من قساوة الدنيا وإنضامن من الغربان
هنا الشرعية كيلتنا .. عدوك ما خرب الميزان
عدوك يا سيدي يا سودان
جميع الحملوهو أمانة .. قام خرم الأمانة وخان
فسخنا .. شيحك في الشمس .. نام إتباهى بالعمران
نفوساً شان تشوف الدم يقطر من حشا الشريان
تنتف بالسنون عصفور .. تشق العامرة بين إخوان
وإيداً تنفحك بالقمحة .. شان ما تنقح الوديان
عدوك الأجرة ما كفت .. عدوك السخرة والسدان
جلداً مردغك في الجهل .. في المرض البطالة عشان
يقري جناهو .. يصح معناهو .. يخارج العندو .. ينقدل .. تباري مدان
يشغلك إنت بالفارغة .. ويطول تريان
وياخد من ثراك الخير .. حصادك سوس من التمرة
ومن الأقطان نصيبك في الورق ما بتقرا
بيقرأ الأرزقي التلفان
يا مقري البيقرأ عليك .. وحقك في القماش أكفان
يا حايم دواء ويكفيك .. وكلُ من عليها فان
عدوك واضح وضوح البروة والنار الدم القيزان
عدوك وماهو خابي عليك .. عدوك فاشية الجرذان
وهنا الشرعية كيلتنا .. عدوك ما خرب الميزان
وزولك فتشو بتلقا .. ما بين السجن والسجان
ما بين الرفد والتجريد .. ما بين الهبة والعطيان
محنتب بي غضب وإيمان
بنصر الشارع الطالع .. وشعبو وديشو في الميدان
يصبح ظلمة الواقع .. يفتح للترى العميان
فيا فاشية الكيزان ..
هنا الشرعية كيلتنا .. وفي كيل أصدق من الميزان
هو الإنسان
مقدم بي هدى الماضي العظيم الشان
مجرتق بي وفاء الحاضر .. محصن بي ضرا الإنكان
مضرضر بي دم الشهداء ورضا الحبان
محمد بي صفاح باكر على زولة اسمها (السودان)

انت يا ابرزقاً موكر في عميق الأرض
في جوف البحار
فوق صناقير الجبال الحين يبيضن
مابيبيضن غير حجار
قط ما في الأرض من رونق نضار
غطي وديانك هجير
صاد مراعيك المحل
صد سيفك في الجفير وأنت تارك ما اندمل
الوطن جواك أسير وأنت هارب ما العمل
البحر حين جاك دمير
ختَ فوق قيفك وحل
مابي جرفك غير رماد حتى عصفورك رحل
طبَ في سأبك جراد قب روسيين النخل
ما جنيت من كد نهارك غير بوار
لا لقيت في يد بحارك غير محار
ما فِضل في كل خدارك فدغصن
لا في دارك من ركن
تضوي نارك تتكل تالاهو بن
دون عمل ؟..!
الما الفايدة منك معني حنك
و الا أنك ود قبائل وليك اصل
نار خلاوي ونور أهل
نظم أفاتوا الدجل
وأنت في فوضي الدجل
خل خروج الغيمة من نفخة بخار
لي دخول الأرض المطر أم بزار
مافي غير تجلب ضراعك في المدن
والمدن ما فيها غير حفنة تجار
وسوقها واحد يا غبن
وأنت أشباهك كتار
جيت تنادي ولا أُذن
طال صراعك للحزن و التصاليت والدوار
كلما فجيت حصار تلقي لجيت في حصار
وكلما ليها المدينة تابي غربانك حقاره
تاذي أعوانك عوينها
تدفرك تالاي الغبينة وحافة اطرافها المهينة
تاخد افراحك رهينة
قسمتك كيف الدبارة
كافة أعيادك حزينة
و البجيلك من يسارها تاخدوا منك بي يمينه
اه لو كان بالضكاره أو نفس طيبة أمينة
غنيتك ما طال إثارها وعاني موالك رهينة
دنيتك كانت بحارها تحتفيبك مينا مينا
ليل فرح قاد في صحاري
لا كهارب لا في زينة
ضيوا كشافة الفقاري قمرا حتى ولو رتينة
إلا يا تارك مسورك للمحل عز المزار
أرض الميري ومتورك و الأهل عارض جدار
بينها بينك وين قمورك في السهل
ما بقوا نار
مافي يا الكانت ديارك
قاجي ليلها علي النهار
في المدينة من استجارك غير ضواحيك ها الحجار
راح زمن حردك تجارك في الضواحي وبالأيجار
غصب عنك وحار و حار
ترضي شان أم الصغار و الصغار شان أم الصغار
والبطون البنتظارك وأنت جاي أخر نهارك
الرغيفات في يسارك وفي يمنيك كيس خدار
عمروا ما أتمنوا المقصتر ذات يوم
عمروا ما استنوا الفواكه إلا دوم
لا في عيد داروا الجديد لا مراجيح لا لعب
لا زيارات للحدائق فنه في الزمن الصعب
مافي شكوي ومافي لوم و بي تواضح وبي أدب
يسألوك أحسن بحرنا والا بترول العرب
الشي مالا في ناس تريدن وناس تزيدن بالكرب
أمهم داخل تصيدن يا ولاد النوم وجب
ويدوا وشهم الفراغ وتدي وشك للترب
آه لو تأذن يا رب آه لو تقبل يا قلب
ثانية بملاهم لُعب عيد بلا عيد الجديد
يجروا في كل الحدائق يقروا بالم هادي رايق
لا متاعب لا هموم في المصاريف و الرسوم
متخمين بالنشوة و الحلوى و الفواكه
بالحقائق والحكاوي الخالي خوفها
حرمان مزله إلا آه ياوضع شائه
منحلج قانون تائه
ومافي تايه غيروا دله
حلمهم مع إنو تافه إلا لكن بالتالله
إلا لكن بالتعب وبالتعب كم مرة جلا
جد زمانن جد صعب إلا آه يا رمل الشوارع
كم حرمناك من غضب
و يا رجوع عرق المصانع مافي بقاقة لهب
الكعب طول ماهو طالع مابينزل غير كعب
وأنت يا أبعرقاً موكر في عميق الرفض
في جوف الصراع في انتظار
الجاي من براك بريه
منوا نفسك أوف خداع
فجر كاذب خدرية
انتبه حتى النخاع
أيدلوجيا الكسر من بيع القضية
في عكاظ الغرب في سوق الرعاع
واجتماع الانفضاض وانفضاض الاجتماع
بين لندن و الرياض كان إلي حين المتاع
انتبه حتى النخاع
انتبه حتى النخاع
ما بيجيبوها الدموع لا الدعي لا الامتعاض
و الا راكض فوق خنوع مابيفرخ انتفاض
انتبه حتى النخاع
ابتزاز الشعب بالمثلي الابيه
لاحتكار الدنيا كان الدين قناع

الصكوك الكنسية في همركوشيب تباع
جنة اوهاج الاسية وجنة الحاج الضياع
وي كأن الله آهٍ يا نبيا
آه يحتاج حماةً ورماةً وتباع
انتبه حتى النخاع
لا متطاء الجيش يا حظ المطية
من تقل ما فوقا من شاذي الطباع
انتبه حتى النخاع
لا امتلاك الارزقية البندقية
وانطلاق الرعب من حتى اليراع
انتبه حتى النخاع
فامتهان الكذب قدام الرعية
وانتشار الأمن في شتي البقاع
لا يخلي الريح يطلوح بي مراكبك
تالا لجات الضياع
اخير دوام الدفي قلبك وفر بصيراتك شراع
مدرتك طول بالك انت و المقاديف الضراع
مافي غيرك من يجيرك ادري بي جوع الجياع
وا وطن يطلع نفيرك
ما مطر ينزل مشاع
الضلام العاد مسيرك يضوي بي اذن الشعاع
في الصحاري يبق خديرك ترعى خالفلك كراع
فوق كراع لا قط بيرك لاغشى تالتك ضباع
ياولد كل القبيلة وليها ماديلا الضراع
ما بتبيت شاه عليلة ديمه نجداتك سراع
البلد تحتك كتيله ليش تأجل للصراع

من حقي أغني لشعبي .. ومن حق الشعب عليّ
لا بي إيدك تمنع قلبي .. ولا قلبي كما بايديا
علمني أغني .. الطين .. المخرطة .. والطورية
الناس الصابرة .. سنين بالحال .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
يا قلبي بلاش نستعجل .. يا قلبي شوية شوية
علمني الشوق نترجل .. نستحمل وجع الجية
واصلين الما بتأجل .. اليوم الشمشو قوية
لا القش بيهاب المنجل .. لا الطب .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
من حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عرق لا آه نتقادم .. سكتنا بياض النية
مش كلنا جينا من آدم .. ومش آدم ابو البشرية
السجن إذاً يتهدم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية

جات داخلِة
زيْ مرقة غضبْ
من جُوف حليم
في زمن صعبْ
رمت السلام
زي شنطة
من كتف المسافر
بي تعبْ
زي رُدْخَة
رٌبْ
الله يا رب
قعدت على طرف
العِنْيقرِيب
المحاذي الواطة
ضايرت التراب
كُسَر العَوِيش
الفوقُو
شالت بإصبعَه
وشختت شخِيت
الله يا رب .
عاينّا فيها
نكُوس سبب
للكفرنة
وفورة الزهج
من دروة البال
الوهيط
ما عودتنا
تدس عوج
تكتم فرح
زي حالة
الزول البسيط
صنقعنا
في قعدتنا
راجعت الوشوش
دنقرنا
عند رفعة وشيها
المُتعَب
الجاد
الرحيم
الطيِّب
السمح
المعافى
رِهاب .. رهاب
ينشاف وسيم
إنوهطت
فوق العنيقريب
القديم
ومن تاني
ضايرت التراب
كُسَر العويش الفوقو
شالت بإصبعه
وشختت شخيت
وقالت ..
تصدِّقوا ؟!
يا ولادي
بقيت أبيت الليل
ممحَّنة في التميرات
القُدر فوق رأسَه
ما خمّت سبِيط
غلبَه الجرُورة
الفوق ضهرنا
تنزِّلَه
وتطلُق وشينا
مع الجماعة
إشِن دهانا ؟!
دي كم سنين ؟
والحال وقف
قطَّ وحلف
ما فيهُو لَو نُقَّاط بسيط
كان بوشنا
في حشَّ التمور
الليلي دُوشنا
معَ اللقيط
أي لا حِكت
هِي ولا بِقت
ما كُنّا قايلين
في حياتنا
يجينا أقسى من المضى
ساعة مروق الإنجليز
قُلنَّا الظُلم فات وإنقضى
تاريهُو كَمْتَر
وقام دقون !
حلْفِي !
وعُشر !
مَعَيُوقَة !
نال ؟!
دِمْسِيسْ !
ضِرِْيسِي ؟
وشوك جُمال ؟!؟
...
...
الله يارب
كُربَك كُرب
عاوْلِي التمور
الأرضِ بُور
الناس حطب
باجُور شهور
غلبان يدور
ما فيش مطور
ويجيك بعد دا
علِم طَلَب ؟!
...
...
الله ..
يا ربَّ
العالمين
الما جحدنا نِعِمْتُو
في الشُوف والسمع
راحة الولادي
ولا قلوبنا عِمَن
ولا غيَّرنا دين !
في الجابُو
ما قصَّر حَمُد
في الشالُو
ما قلنَّا لُو
وين
ماشيبو ؟
وين ؟!
...
...
عدَلت نعال
مقلوبة
في الجيهِة اليمين
حدَرت يسار
زمناً مو دا
الحيكومة
كانت بت حلال
بي حالَه
بي حرب الجنوب
بي قِلَّة المال
في الجيوب
كانت رخيِّة العيشِة
إلاَّ تَرَا العوِين
الكِبْرُوا
كِبْرُوا مليَّسِين !؟
عِلِمُن يطير !؟
إن كان هُو
ما صلَّح عوج
ما فادنا شي
ومحَق القبيل
لمِّينا
هِينْ × هِين × هِين
آ حليل رجالاً
سكّتن
غدراً غشاهن بالقفا
ولليلِة سيفُن في الجفير
يهرِج سنين ؟!
...
...
دا زمن قواسي
زمن ضلالة
أوانطجية
زمن حقارة
زمن مُهين
لاقين هواكُن
ضرُّوا
ضرّ يا عسكرياً
ما اتَّعظ
كتل الرُقاب
بيودِّي وين !؟!
ضرِّي آجلاليباً رُهاف
زمماً خُفاف
ضرَّ يا ضرَر
ضرَّ يا دقين !؟
منسلبطين عَرَق النبي !
وبالنار بتلعبو
يا عَوين
للحُول قريب
درب السلامِة
تخوجُو
بي درب الحرب !
غطيي قلب ؟
ولاَّ الحرب
بقرة حلِب
والأرض صين ؟!
ما كان عمل
ما كان دا دين !
يا أرزقيِّة
تخمجوا دم
والدم مُو
مُويا
ومانا طين ؟
منسلِّطين في الناس
دَحِين
لامِن يجي
اليوم الفصِل
والحق يبين
وين
تمشُوا
وين
تنسلُّوا
وين ؟!؟
وكان طال
وكان قِصر الزمان
الحين بحين
كَب يا رجالاً
سكّتُن
غدراً غشاهُن بالقَفا
ولليلِة سيفُن
في الجُراب
يهرجِ سنين ؟!
...
...
وإتاوَّهت ..
وحسِّيت
بأعماق الشوارع
والتواريخ المجيدة
إتأوّهت
وأدَّتني عين !
صنَّت شِوَيْتِْين ..
كُوركَت ..
يا بت ..
شمشنا إندهدَهَت
هُوي
يا بِنيِّة وِكتنا راح
شُوفِيلي
شافِع بت فطين
جاء من الطحين ؟!
الله !!
فترنا من الطحين !!؟
...
...
وكان الوكت
زالَف عصر
عين الشمش
مشدوهة
بي دوْشَة سحاب
عرَق المراكبيِّة
البعاد
راحِل
معَ ريحة التساب
ما تدري مارقِة
من البيوت
الحلِّة
ولاّ من التراب !؟
التاس تقول
مدقُوقَة
طالعِة على الحُقاب
مفلوقة
بي حجر الصعاب
المُرَّة
نازلِة على البحر
مشروقة
بي موية السراب
الفرَّ
مشنوقة عقاب ؟
يا الحُرَّة
كيف بِقت الرُقاب
مسْيوقة
بي قيد السلاب
وإنشرَّ
من نشر الحجاب
في عروقَه
أشكدِّي الخراب ؟!
من بعدِ
ما انبلج الفرج
من ضِْيقتا
خدعوها بي حيلة كتاب
رفعوهو فوق
سِن الحراب
ودهت الهزائم
خِلْقَتا
فالناس بدَل
عن نِقَّتا
التلقى فكَّة ريقتا
وبدل القصور
الفي الخيال
التبقى ماهلِة
كِرِْيرْقَتَا !!
وما جاتَه راحةً
طَلَقَتا
إلاَّ التعمِّر
طَلْقَته
في بندقيةً
حقَّتا
وبي ها الشوارع
وبقَّتا
تنسدَّ منَّك
دقَّتا
ودم فلْقَتا
ومُر شرْقَتا
ونار شنْقَتا
يا دقن
دينك سرْقَتا !!؟
قطعَت وضوها
إنشرَّفت
مسحَت وشيها
إنشهَّدت
قالت نِست
ما تاقت الأوضة التحت
عند مرْقَتا !؟
دارت تقوم
جَبَد العَنيقريب
الحنيِّن
طِرْقَتا
عند نتْقَتا
رجَفَت بِشيش
رجفت بِشيشي
من الغضَبْ
ولاَّ من التعَبْ ؟
فتَر السنين ؟
ولاَّ الكُبر ؟
دا الما قِدِر
يمْسَح
سماحة خِلْقتا ؟!
زي نِيَّتا البيضاء
الشَعَر
وموِّيج بحر
كان الجبين ؟!
...
...
مدِّيت يميني
أساعِدَه
ردَّت يسارَه
تباعِدَه ؟!
وقالت لِي
أبوي ..!
وفِّر ضُراعك
للبلد ؟
وأدخُر مُرُوَّتَك
آولد
لي يوم بحين !
أحفض كرامتك
تحفضك ؟
الموت !
ولا العيش المهين ؟
الموت
نَفاد الما نَفَد
الموت
حياة الميِّتين
أَخَتاها جنِّة
معَ الفِقَر
وأدخُل
جحيم المتعَبين
وإن ما قِدرْتَ
علي دا
أبوي !
رب لك دقين ؟!
وضحكت ..
حمدنا الله
الحنون
جِيدَن خَلَقْنا
بلا دقون !!؟
وضحكنا زين
!!؟
؟؟!
وتاقَت حديثَه
على الخراب
الشُوفتُو
ما دايرا لَه عين
عقبت متاقاتَه
الرياح
رفعت قُران
شوكة سنط
ساسُويِي
جايي من المراح
يا خيري ودَّ
دي المستراح !
والشوكي
تحت الدُوكي
يا
داك الركين
الشوك بَمُرْقَ الشوك ؟!
وشوكاً فينا شين ؟
مرّاقو ربَّ العِزّة
شعباً ماب يلين
الجايي
حيكومتنا
لكن الزمن
دِبُّويي
داير النهمِة
وينكن !!
يا الخزين ؟؟
ما قلَّ حاشا صَبُرْنا
لَكِن لا مِتِْين ؟!؟
دعكت عيونَا
التوَّّعت
مسحت وشيها
وصنْقَعَت
كان الغيوم
إنجمَّعَت
تِقْلَت على الريح
النصيح
كان المطور
شوَْْوْوْ
ترَّعَت
زي باكي
فوق دمَّ الحِسين ؟!
لكن دا وين !؟
والتاني وين!؟
وإتلوَّعت
معقول !
في ناساً ما وِعت؟!
لليلِة
بالن بيَن بِْين !!
وكيف
وإنتو نوحنا
من الدَعَت
مؤمنَّا
من جُحر الدقون
الكاكي
يلدَغ مرَّتين
والتالتِة
قرْصَة أبُو الحِصين !
وحسِّيت بأنها
دمَّعت
شهقت عيونّه
الدمعتين
حسِّيت بأنِّي
مِتل حجر
جدعوهو
في نُصَّ البحر
قام البحر
بنَى فوقُو طين
حسِّيت
بأعماق الشوارع
والتواريخ البعيدة
إتأوَّهت
وأدتني عين !
...
...
ومرقت ..
...
...
متِل دخْلَة
غَضَب
صدر المسامح
والحليم
في أيام عجاف
كرَمَت ..
صداها ..
قفا السنين
...
"الجايي
حاكومتنا
كيف !
ومتين !
وين ‍‍‍‍؟"
...
ومرقت ..
مَرَاة
مرَقت
مرَاة
...
...
دي السُرَّة
بت عوض الكريم
مرَاة ..
ماب تلاوِز
لاب تخاف
زي الضفاف
الماب تهاب
ضَنَب التماسيح
والكلاب
قُومة البحر
ولاَّ الجفاف !
مَرَاة من قديم
مَرَاة بت قبائل
قالوا
لا
واختاروا في الحق
الجحيم
ومن رِفقة الفَسِل
الخلاء
وكانت نَعم
تدِّي النعيم
...
مرأة من صميم
ضَهَر الغلابى
الماب تنكِّس رأسه
غير ساعة الصلاة
أو ترمي تيراب
في التراب
أو تستشِف
وجهَ الأديم
...
...
السُرَّة
بت عوض الكريم
ما فيها
من عادة الحريم
غير السماحة
القدَّمت
قُدم الدهب
حافضنو
في حُقاً قديم
في أقصى كِيم
ما فيها
من طبع الرجال
غير الأيادي
الخشْنِة
زي قولة النصيحة
وكت تعكِّم
في الصميم
ساعة يكون
الحُكمِ ضِيم
...
...
...
تسعين سنة ؟!
ويا السُرَّة
بت عوض الكريم
بصرِك بصير
سمعِك سميع
نضمِك نضيم
بالِك محلُّو
صبي وسليم
تسعين سنة ؟!
وعُودِك أمدَّاً
ما انحنَى
شامخ
بلا البان القديم
تسعين سنَّة !
ومن فِتنتِك
إستغفر الله العظيم .؟!
...
...

النخلة في الليل المهول .. وحيدا في عز الرياح
فارس يدارق في الرماح .. الجايا من كل إتجاه
رغم الجراح .. شح إلمي .. الزاد والسلاح
راكز يصول .. لا أنّ ولا حنى للجباه
لا خان بصيرتو الإنتباه
لا حتى قال ديل المغول
لا ختّ آه على عز قديم .. روح عجول
طول مداميك الصبر .. سدابا طاقات النباح
كل ما نزف من جوفو دم .. كل ما عزف لحنو الصباح
نجم الميامين الحمش ..
ينضارى شان تشرق شمش
تدي الحياة .. الناس .. الحقول .. الدابة .. والطير .. والبمش
لكنو ما بخبر أفول .. والأرض مخلاية التعب
مصلاية العشق الصعب .. ما بتستباح
زي نخلة .. في الليل المهول
كانت بتختبر الفصول
كانت بتمتحن الرياح .. كل ما تطول
والدنيا خوف عابر سبيل ..
يشوف عنف الرياح في النخلة .. واللا النخلة في عنف الرياح
في ليل مهول
طوالي راح يحلف يقول .. النخلة ما بترجى الصباح
والطيب الصابر سنين .. راجيها باكر .. حقو راح
لا فكّ دين ..
لا سدّ جوف .. رزقو المعلق في الصبيط .. مشهادو أصبح بين بين
النخلة ما بترجى الصباح .. لكن ضراعاً في البلد عارف عروق النخلة وين
خابر صمودا المن متين .. وسامع مناتقة الرياح ساكت صياح
لكن ضراعاً في البلد عارف عروق النخلة وين
ضامن ثبات ساقا الهطيط
وسامع مناتقة الرياح ساكت صياح
النخلة ما بتقدر تخون الأرض .. ما بتقدر تكون غير المراح
لي همبريب يغشى البيوت .. عند الصباح
نص النهار .. عند المغيب .. عز الرياح
النخلة تتجاسر تصون عش الطيور البينا .. تفرد للجناح
ما ليها غير تطرح تمور .. تملا الشواويل والقفاف
ينتمّ زين .. ينحلّ دين .. يطلق ضهر زولاً بسيط ..
واقف على حد الكفاف
ومن ركة الرزق المتاح .. رزقو المعلق في الصبيط ..
ينزل كما الطير الخفاف .. يقدل نشيط ..
يخضرّ زي شتل الضفاف .. كل ما النشاف بدا في الصبيط
والنخلة لو عنف الرياح .. الصاعقة ..
أهوال الفصول .. آفة الذبول .. قدرت على ساقا الهطيط
تقع آ بتموت
تلقاها خشت في البيوت .. بي كل صراح
تبروقة .. سجاجة طهورة .. طبق من العرجون ..
ضنيب هبابة .. قفة وكسكسيكة .. حبل متين فتلوهو في ضل الدليب ..
نشلوبو من بير للشراب .. نسجوبو بنبر وعنقريب
تلقاها خشت في البيوت .. وبي كل صراح
جوبيل جريد يعرش سقف بيتاً جديد
أول دخلتو عريس سعيد
مبسوط يقرقر بانشراح
أو حتى واقوداً تقيدو السمحة في نار بارتياح
لي يوم عزيز ..
يطلع خبيز
نبيذ الليل صفاح
يطلع ملاح .. بروبو ناساتاً ضيوف
ولي زول وراهو شغل بعيد .. جابرا الظروف
يطلع قهيوتو وشاي صباح
وآخر المطاف ..
الموت بيلفح بسمة من توب الزفاف
الموت بيشرق نسمة في كل الصبا
النخلة ترباية العباد .. بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة .. شوف كيفن بتتحدى الرياح
تعبر على مر الحياة وتنمطق الموت بي جلد
من بعدما ملت البلد .. شتلاً معمر بالألوف
وشايل مخلف بارتياح
طول المصير .. النخلة حوتة الصحرا .. نوارة الجروف
تلقاها في أجمل وشاح
بي جراحا رجّتنا الصباح .. يا القلتو ما بترجى الصباح
النخلة تحت الأرض سر .. والنخلة فوق نخلة نصاح
والدنيا أوسع ما تكون .. والجو براح
وكل الرياح فوقا بتمر .. يكفيها دا .. ويكفيها صاح
ما استسلمت لي ريح غريب .. وكل الرياح فوقا بتمر ..
والنخلة ما بتخبر خلاف ريح اللقاح
والهمبريب وريح الصلاح
يا معوض الليل بالصباح
يا معود النار اللهيب .. روض نخلنا على الرياح
وفي لجة البحر الغريب .. أدي الرواويس الصلاح
يكفينا دا .. ويكفيها صاح

(تعالي .. فإن الأيادي التي في كتفها صقر قتلننا ثم لم يحيينا قتلانا)
الحال وراك كيفن تسر .. باقيلك إنتي بلاك في زين
ما تهشم إبريق الرضا .. خنست نسيمات السمح
والبسمة زي حبة قمح
لفحا وطفر طيراً كتر
أورث عصافيري الضنى .. يبس غناها مع الفجر
هطل على الشدر الهموم .. وشاشات نهارات العنا
عانيت وراكي جنس عنا
بوغ سهادي كرو النجوم
خطو المواويل إرتعش
حرس عصاتي بنات نعش
دومست فوق حجر البتول
هلوست بي صلب المسيح
دروش .. شردت من الضريح
شويمت بي ظلم الحسين
أومت علي كم ميضنة
وما بين عيونك والمغول
ساهد بي قافلة الحروف
وإيقاع ظنابير الزمن
إنصربع إيقاع الفصول
هبطت غمامة ورا الجبل
طرحت من الليل الجروف
شهقت شعاب إنساني خوف منك عليك .. على أي زول
توك نياق شوقا الضنا .. سرح عصا التسيار قبل
درب الحياة المرمول فنا
يا وقعة الواقفين هناك .. يا وقفة الواقعين هنا
يا آفة الوطن الجريح .. إشمعنى لا وصلك دنا
لا آفة الزمن المشيح .. قدرت رويحتي تيقنا
من جيتك المرقت بسيم .. الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكية فوق شعب الصبر
ساندتها .. علم بطانا الشيطنة
غنيت معاهم .. سودنا .. يا سودنا .. يا سودنا
لملمتهم والدنيا ليل .. والقمرة بت فاتا القطر
وصف لهم حتة شليل
ردد حروفهم ردتها
وقف سحابي مع الدغش .. شهدتها
شهدت معايا على العذاب .. الهد أطلاع الغبش .. راعفتها
تكلت خدودا على بكاي .. لاقيت سجون .. جاهد بها
بي جيهة الجذب القديم .. دخلت مكندك بالشباب .. خنت التراب .. راودتها
فوق ها التراب .. واعدتها
لا إنتي جيتي ولا هي آه .. روحت وين
يا زين مرقت مشيتي وين
كل البنات جو من الملي
هشت بكت شدت حكت .. وأزيارنا والمرحات خلي
يا إنتي يا مرت العدل .. ماك في صعيداً تترجي
روحت وين .. قوليلنا بس من الغلبان تجي
لو فينا أطلعي مننا .. أو برة أدخلي .. أدخلي
غنيتك البارح براي .. إنصلبتو التانيين غناي
والليل بتواتاك شعر .. دونو إنعتاقك أو فناي
هيا يا مغنين الشعر .. ضد ها الزمان وطبنجتو
شعر الشعر .. شعر أيوة يلا علينا جاي
ونكر المغني كمنجتو
نادوس يا فجر القصائد إندلق
ما حك جلدك مثل ظفرك فانطلق
إنا شرحنا لك صدرك .. أو شرخنا فانعتق
يا أنت يا كل الذين لأجل خاطرهم طهوت غداة عقم زهور كلم لتنفتق
غضباً يؤرق موقديه .. كورته ..
رجماً لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك .. تبت يدا كل الذين تغامزو
وتهامزو .. وتلامزو .. وتقززو .. وتلذذو
من فيه جرحك يا وطن
نادوس آه .. نادوس يا ...
أمسينا يا نادوس واصبحنا بيك يا أم
يا سوسة ضد السوس .. قلباً بلاكي يضم
ليل الضياع مهووس .. يحلم هواك يؤم
بعض الحصاد الروس .. عالم نداهو يعم
ختيت هواك فانوس .. بقالي شلتو وحم
جيت المدن باخوس .. لاقيتو جالب السم
راشح هجير البوس .. وكل الوجود دم دم
كوركت يا نادوس .. أم الغبش يا أم
يا نخل يا أبنوس .. يا سامبا .. يا تم تم
يا البيك غناي محروس .. دخري الغلابة هلم
دهمني كم مجروس .. وعكمت تاني وقم
حمرت في السحب المكبرتة ..
يا دخان يا ريحة يا .....ة للبحر المخنس والعساكر والملس .. ما تختشي
بيوضة يا ماخدة الخريف .. ما طمبرت عربانا شي
مستني في الزمن النزيف .. القال بجي وفات بي وشي
رشت النهار بالصبر .. أبت المغارب تترشي
دقست سواقي المتعبين .. كايسالا فيها عقاب عشي
بيوضة آه .. أواه لو الكلمات حصى
قالت لي الله اقرب فرج
أواه لو الكلمات لهب .. نرجم به وش زمن القسا
قالت في إطن الليل وهج .. هدام أمان الناس نسى
دنقرت للأرض المسربلة بالسراب .. فرغت بي غلبي العوج
فقدت أيادي العصا .. شديت حزامات الجلد تالا ضرا الواطة
كوركت صد .. أرجع يا ولد ..
طورية أبوك تراها دي ... عاند كواريكك مشيت .. طورية أبويا تراها ديك
لفحوها لمن قام يصلي .. خطاب بكارات الغمام .. مغرب صباح ليلة دخلتو على البلد
حرق عرق .. الفي الكلام عطشان سقيت عرق الشديرة من المطيرة الفيّ كان حس العساكر لا ورا .. قالت لي اجر .. شدرة غنايا جريك ضرايا جريك ضرا قبل العساكر ما تصل قبل الدرادر ما تبين .. وكانو العساكر في وشي .. قت أقول وقع .. طينة الجداول ماها زي طينة جسارتك يا بلد والكل طين
يا نبوت .. دقة تفوت .. ولا حلم يموت
النندق .. نندق .. نندق .. ويفضل باقي لهيب الحق
حق الناس ينزل في الحلق
أو ينعارض شوكة حوت
يا كهنوت اليجي كابروت
يا جبروت اليجي كابروت
يا كابروت .. كابروت .. كابروت
كابروت عشم وطن الغلابا .. الحال بلاك تب ما تسر
ما بان صباح أو عسعست قدامنا ليلة تزيدنا ضر
أوتارنا يا آخر الغنا .. حردان عشياتا النغم
فرغت مجالسنا البلاك .. عنكب على أبوابا السأم
أنزح .. كفانا كضب رياح وبكاء رعود وضحك برق
العشب مالي حشا الأراضي .. حواهو لما العش حرق
الشعب حي .. بس كيفن تصد .. يملابك المليون عرق
كدبنا في الثرى في رجاك .. مافينا زولاً ما عرق
ساوين عصا الأشواق مرق
عربان ونوبة نهاتي بيك .. والزنج تتمناك عتق
ورا يا وجع .. هيا يا طلق
صد لي ملامحك يا حراز .. ريح العوارض غربت
فرتق ضفايرك في الرذاذ .. جية العصافير قربت
لاقيتا في غابة مديني .. وسط شتيلةً حبحبت
على عش صغارا الدوب حبت
ما وقف الليل لا الهجير .. كم جفّ ريقا وورتبت
لاقت من العنت الكتير .. ملت الفيافي .. أحدُ أحد
فايدة جناحي بلا أطير .. الموت ولا العيشة النكد
يا نيل مدد
يا غيث مدد
ندى دمر نادوس ونشوغا ...
وخلي الناس الصبحت يوم من حيات الخور ملدوغة
خلى الصوت الكبتو الجوع يلقى براحو .. يضوع ويضوع
الصوت العالي .. يا صوت الناس التحت الواطي الما مسموع

أملأ قلبك بالوطن ... بالصُّغارْ
قومة العمال دَغَش ... بالنّضارْ
المزارعية الغُبُش .. بالجنود الوين تخش في سبيلك كالنهارْ
بالمداد الما بيغُش .. بي وتر جاء من الجحيمْ
أملأ قلبك بالنسيمْ
ملِّي بالطير الرطنْ
طيبة والعالم قديم ... ينسى كالريح ... المحنْ
خلِّي بالَك مستقيم دغري وإن مال الزمنْ
راحل الليل البهيم والبصيرات ما عِمَنْ
الظروف الليلي أبن ... طيبة لا خوف لا حزنْ
باكر التِّقْيات تنورق وتنملي الضرعات لبنْ
طيبة يا صمت الحنين كلما طفاهو همْ
لا في آهة ولا أنين لا بيروع ليح ودمْ
من مرارات السنين من عصارات الألْم
بيمرق الشوق الدفين بي كعنكيل العشمْ
احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ
والمراحات قاطي قطْ
فجأة في قلب السماء ... غيمة غيمتين .. غيم ربطْ
كتمة حتى الطين عِرِقْ
والشجر قرب يَبِقْ
إلا يا طيبة الخَلِقْ ... من بدل تفرح تَنِقْ
الشِّكايات ... السخط .. لا السُّحب دارت تَصُبْ
لا الهبوب داير تَهُبْ
نسمة نسمة آ رب هبوبكْ
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خش آ حول في حول ...
ظاهر الحال ماهو مخفي ....... وقولنا فيك ما فيهو قول
نسمة كل راس ساعة تكفي ....... نسمة واحدة لألف زول
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ... لا ده لا ده ولا فرق
طيبة تمي الحكوة قولي
الصّبرُ خلقوهو هولي
الزمن يقسى ويَرِقْ .. وانتي يا كتمات تطولي
اليطول بال الخلق .. طَرِّقْ الغنوات يا زولي
عدّ فات الريح شَرِقْ من بعد ما جاب سحاب
من بعد قشّ التراب ... مشط القش والشجر
رجّع الطير للوكرْ
ها البرق شال البرق .. الرعد ريحة الدعاش
ابشروا بالخير نقطت أي والله المطر

إن رجع وايدني فاضي
يابا ما راح تبقي راضي
والبلد ما بتبقي راضي
ونفسي ماراح تبقي راضي
والنخيل الكان بشابي
يهش ينادي يصد يقبل مني غادي
والدروب الكان بتفتح ضفتين
احضانها نادي
عليها اه تسب خطايا
تكب ترابها علي قفايا
تقوم تعتر لي جوادي
والقلوب الكان بتفرح
تكشح الشوق في الايادي
جيتي ليها بلا ابتسامة
تبقي زي جيت الغمامة
للاراضي الغبشة فاضي
با نخل ياطين سلام
يا غلب في المغربية
لما تتزمر صبية والا حبوبةً قبيلك
باركة لي امي الشهادي
في التراب الراجي لي
تنقلب بي شد علي
وتنكسر قدر الولادي
يا غلب لو عدت فاضي
للغمت في ايدي موادع
او عصر حق الزوادي
يا بحر مابي الزيادي
يانخل ياطين سلام
ياضراع في التقله يكدح
يامدارس ياحدادي
ياغبش صر ياغلابة
يامقاطيعاً في وادي
وضالتن ضلت في وادي
وداي كفرن فيني شعوت
خيل قراطيسي ومدادي
من مداين غيمة دافق
نيل سلام يروي البوادي
او يبل ريق امي يمة
شوقي جاي اشواقي غادي
مشتهيكن نشتهيكن
في صهاري ايامي يلمع
في ضلاما يبق وشيكم
وفي خطاوي الناس بفتش
لو اصادف يوم مشيكم
وحد ما اعاين في عيونن
ما الاقي متل عيونكم
وغربل الالوان وحاتكم
ما لقيت يا يمة لونكم
ما انتو لونكم لون بلدنا
لون جناينا لون سماها
لون ترابا و لون نخيلا
لون قماريها وهديلا
وضفتينا الماسكا نيلا
وبينا هادر زي مسيره
انتو صوتكم صوت بلدنا
صوت تواريخا وضميرا
وصرختو الدواية العزيرة
وباقي زي نار الهجاير في حطب
غابة الظهيرة
حس شروقا الفي عروقا
حس جداولها في شتيلا
حس بهايما في المغارب
و النسيمات الهميلا
حس وليداتا وغناهن
فوق عميرن ليله ليلا
يسالو القمر النجميات
عن شيليلا ويا شليلا
يا شليل ما شف بطانا
هد ظلم الدنيا حيلا
يجروا عاجين الشوارع
واحليلي ويا حليلا
ياحليلكم بشتهيكم
انسي وارجع بشتهيكم
إلا عاد كيفن بجيكم
وماني شايل الجيت عشانو
عشانو فارق ضو عينكم
عايز اقولك بي صراحة
من وصّل ما جاتني راحه
جاري فوق الفوق افتش
للشغل ما سبت ساحة
كم برد جا إتغت بي
وكم هجير سواني واحة
كم شمس صحيتا قامت
ما لقت فردة جناحا
والرياح باليل تعافر
تورت في الذات جراحا
وكان حبيت العرجي قالت
ما ح ترجع لي مراحا
في بحر ممسوح مأسي
شاقي تحلم بالمراسي
ما الشغل يا يمة قاسي
الفراغ يايمة قاتل
في انتظار ما عندو رحم
وكل شي بيناتو زحمة
البرد يايمة كافر
وصيف غريب ماضاقلو نسمة
وكم بطون احلاما لقمة
وكم بيوتا انوارا ضلمة
ياني زيك بينا يودر
بالو يضهب ضمة ضمة
يما يتعب حالو يصعب
ما المعايش قاسي يمة
يابا يالكدح المضارع
ياوتر نغم الطواري
المدن شرقت غناي
توكت صوت الغفاري
وادت اولاد الحرام
الكرابيج و الامارة
ميضنة جامعنا تنقز
ما تصل كتف العمارة
أن دعت الحضارة والرياح
بيها تتعوز حصن النفس الابية
وارخي اضانك يابا لي
ساعة اقولك بباسطة
هنا الشغل داير وساطة
ومن وسيط قاموسي خالي
والمكاتب من تشوفني
تصفد البابين قبالي
ما اتملت بي الفيها فاضت
وما غريب مالا ملي
وما حارجع يابا لالا
لا حاهاجر الا تالا
نجمتين خاتك في بالا
نجمة للخير والجمال
واحدة للحق والعدالة
ما انت عارف اني حالف
بالكسالى المو كسالى
بابتهالات العطاله
بجريهم في هجاير
بقت النار من رمالا
بالبلد بى الشالو شيلن
وفي وجيعتا وقالوا لا لا
بانتظاركم طول نهاركم
شرقت الشمس وزوالا
بالصغار المرة تفتل
ومرة تجلب في حبالا
وبالايادى الياما شادت
ناقشا عزتا بالزباله
بكنايسنا اليتيمة
وكوم جوامعنا الثكالى
وبي مدارسنا العليهم
دقت اجراس الدلالة
بي جدودنا الماتو ساكت
يابا بالضايعين همالا
بي تميراتن تضاددي
لاحيت لا موتا شالا
بي مشاريعنا البتحلم زي عوانس
راجية يوم جية رجالا
بي خضارنا القام مهضلم
عينو موية النيل قبالا
بي بكية اختي البترضع
والضياع واقف قبالا
بي تويب امي المفضل
خير وشر ساتربو حالا
بنكرب يايابا واصبر
رغم انها ماها حالا
رغم انفك يا عوارض
يا تفاهات ياسفالة
ما ح اركع ما ح اسجد
ما ح اعبد للخمالة
وبنكرب يا انتو واصبر
رغم انها ماها حالا
وكان حفاير الصبر قلت
في الضلوع بحفر لي دالة

بيروت رِبَاة بارُود


حبّت تمُوت
بيروت !
..
تحرَق ..
حراق الصوت !
..
تغرَق ..
غراق الحوت !
..
زي طائر
الفينيق
المامناسبَ الموت !!
على كيفه
حرّة تموت !؟
..
أصلاً رباة بارود
من دون
بَرُود
وحَنُوط
زي لَمبَة الحانًوت
مِتعَوِداهُو ..
الموت !!؟
..
شان آخِر العنقود !
والأُولَى
في البنُّوت !
دون المُدُن
بيروت
الموت مَدَلِّعه
مُوت !!
مدِّيلَه سبعة
حيوت !
يوما التموت ..
هُو يموت !!
..
يا بِت
عليكي سلام
جيّاش وما مشروط
أحلامنا
تبقى أحلام
وبأوهامه
تمشي زلوط !!
..
مافي الوتر
ده كلام
فارغ ..
ملانا سكوت
عبَّ المطر
نسّام
راس الشدر منكوت
..
تلقاني أنا الإنسان
بتشهَّى دايماً
يُوت
جيَّة زمن حنّان
ومالي نفِس
في الموت !!
..
سارجَ الهواء
المجَّان
على كيفي
وين ما أفوت ؟!
..
بالفيِّي من وجدان
جاسر
على الجبروت
قادر
على الطغيان
والطاغية
والطاغُوت ؟
..
كم مَرَّة
يا لبنان !!
تابوت
وراء تابوت !؟
ومنُّو .. وجديد ..
غليان !!
تنزِل من الملكوت ؟
..
يا أرضة
نحنا حجار
جرَّبنا كم مارُوت
يلقانا ..
ما يحتار
ذات الغلَب هاروت ؟؟!
...
هدِّمنا ..
يا طيّار
ما تخلِّي فوقنا
بيوت
عَدِِّمنا ..
نفّاخ نار ,,
أطفالنا سُوطُن
سُوط
تلقى الدفنتُو
بِِذار
تِحتَ الدم
المحتُوت
..
أوَّل تجي
الأمطار
من حلمنا
المبعُوت
حالاًّ تضج
الدار
والطير يغالِط
صوت
أطفالَه
والأزهار
قاشرة
وتلوِّح يُوت
..
الإيد دوَم
في الإيد
والاِبتسامة تفُوت
يوماتي
عربون عيد
بالأمنيات مغمُوت !
..
من تاني يا حقَّار
بالله
قَبلِ تفوت
دفِّق عجاج النار
صُب ما تَصُب
من موت
وما فيكَا من جبروت
دُوس الحشا
بالبُوت ؟!
..
بس كلّو كلُّو
يفوت
ومِن معصَم البنُّوت
تمرُق
كما الياقوت
منُّو .. وجديد
بيروت !!
..
هادي الفضا
المحروت
بالطائرات
الموت
يملِنُّو بالزغروت
برق المطر
هط سوط !
..
..
الليلة لِيل
والليل
غير الزمان
وقِبيل .؟!
ديل الأبَت
ما تشيل ..
غِيرُن ..
ضهُور الخيل !؟
..
حُرّاس ..
وكيف فرّاس
يتحدُّوا ...
مُرَّ الويل ؟
رأساً ..
مارون الراس
قدماً ...
لِبِنتِ جبيل ؟!
..
..
*ولدي ..
الدرب دا طويل
دايرَ النَفَس
بالحيل
..
خبِّر جمال الشيل
من خطوَة ..
يبدَا الميل
..
قصَبَة مدالقَ السيل
قطعاً ..
خدارَه تقيل
,,
راس الجبل
مُو نخيل
وين ريحُو مال
هُو يميل
..
فُوت اليجيك
في فتيل
للبين رياضو أصيل
..
فَزَع الأخي
مُو دخيل
والماطراكَ .. بخيل !!
..
سِحرَ العيون ..الريل
وين ,,؟
يوم دماها تسيل ..؟
..
دمعاً قبيلة
هميل
ما جففُو المنديل !؟
..
خل الوراك
لله
وابرَى الدرِب
دا عديل
يا جِِبتَ حَد
للآه
يا رُح فداكَ
كتيل
...
- شكراً ..
يا ابويا جزيل
شكراً ..
لإسرائيل !!
وأمريكا أمَّ الويل ؟!
...
ظنَّت –تعالى-
الله..
سوّاها عزرائيل !!
لابُد تشيل الآهـ
وما طفَّفت من كيل !
...
شكراً ..
لكلِّ عميل !
مِنَّ الفرات
للنيل ؟؟!
..
ديل علَّمُوني
أشيل
حِملي المخيف
وتقيل
وحداني
فوق كتفي
دام كتفَ أخيِّي
شلِيل !!
..
عُذراً ..
كتير لبنان
صبراً
على التنكيل
..
فِعلاً
هي الأحزان
تمِن إنِّك
أبقى جميل !؟
..
سيِّد ديموقراطي
قِدّامي دُغرِي
عدِيل
حاضِر على الآتي
والماضي أصلُو أصيل
..
يا أروع الأوطان
يا مَن
تكيل العين
بهجة وجمال فتّان
"قانا"
أفرَعِك من وين ..؟!
ولاَّ أفزعِك
بي مين ؟؟!
"يا صيدا"
والغزلان × فتنتك
× أتنين
..
لبنان ؟
سُمُو الفنّان
عُرفُو ؟!
وتراثُو .؟. ودين ؟!
أنهار ..!؟
وطير ..؟! وجنان !؟
غلمانَه ؟!!
حُورَه العين !؟
ساحل .. ؟!
سهول .؟. وديان .؟
رملُو ..؟!
وجبالو .؟. وطين ؟
وما فوقو
من إنسان ..!!؟
..
بيساوي === جنديين !!؟؟
..
أم أنَّ هادي النار
هادي الدمار
الشين ؟؟
هادي الزفار
الحار
مِن أجلِ جِنذيين !! ؟
..
يا خُبثِ ذاك الفأر
جاب التراب
مِن وين ؟!
كُل الشَب المدرار
ما رَوَّقك ...
يا طين ؟!
..
لا أشتُم العربان
والواقِفِين
بِين ..بِين !!؟
..
فليمدَحه الخُذلان
وعار الفِرَج
لا وين !؟
..
عالَم بيتفرّج
على دم يلُك العين
وآخر بيتحرّج ..
الله ..
ده عالَم وين ؟؟!
.
$ جيش مصر
يحمي مصر !!؟
علَى مصر لا تثرِيب
بس عَن وطن
في الأسر
- يا حُزني ..
يعني غريب ..؟
أم يعني
مَن في القصر
مَا يحمي تلاّبيب ؟!
..
شرفان فتَح دكّان
العين على
الفي الجيب ؟!
ما ليهُو بالأوطان
غير كم تُرابَه
يجيب !؟
..
مِنتلِّح الأديان
بالعيب
تغطِّي العِيب
غط عورة السلطان
تكشِفلُو
ما في الغيب !!؟؟
..
من نار
دخانَه ... لسان
غضَب النبي
الغلِّيب !
..
$ درب السلامة
قريب !
..
* درب السلامة
نسيب
فاضي الكلام
ما يجيب
بهماً
جَرابًو الضِيب
..
ضيباً ..
في واشنطون
وآخر
في تلابيب
تالت تِحِت قانون
قانون دمار ..
تخريب
روعة نظام الكون
يرتَع وسطنا
قريب !؟
..
دايرين حياتنا
تكون
حُرقة ونواح
ونحيب
..
لكن ..
وربَّ الكون
هادي الضلامة
تخيب
الروح فُراقَه
يهون
شان عزّتك يا حبيب
..
يا دُخري تربَى
بدون
خبزِ الغريب
وحليب
الأرزقي المأفون
بأعشابه
"شَبعَا" نطيب ,,.؟
..
دا وطن ..
وأنا المفتون
بي أهلُو ..
سهلُو ,, خصيب
أمسِك عليك
العُون
أنا هُون
طَلعبي ... نصيب ؟
..
بين المعزَّة مصُون
يا بوي
في أحَنَّ قِلِيب
..
من لحمَنا
المحرُوق
..
من دمَّنا
المدلوق
..
من رِحمَنا ..
المسروق
..
مِن حِلمَنا ..
المشنوق
..
مِن قلبَنا
المطفوق
بي حبّنا
المذنوق
لي شعبنا
المدقوق
بيناتُو كَم خاذوق
..
من جوفَنا ,,
المشرُوق
,,
من صفَّنا ,,
المشقوق
..
شدَر الوطَن ..
مَخَلُوق
دايماً ..
يطُول لا فُوق
..
ويا فُوق ..
رعُود وبروق
أنزِل ..
مطَر ..
ما يرُوق
إلاّ ان يرُوق
الشوق
بأنبَل
وأعزَّ شروق
..
وتطلَع فجُر
لبنان
مِن عضمك
المسلوق
..
المجدِ للإنسان
والكون
دا ما مطلوق
؟..؟
لبنان
يظَل لبنان
رُغمَ القَهَر
..
يا ..
عِلـــوق ؟؟
...
الدم
سُقا الأوطان
وللقادمين مارُوق

يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل -
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك

جاييك من آخر الريد مشياً
على الأشواق
عز الليالى البيد آنست
نورك باق
خبيت مشاعرى شديد
الدروخة الساساق
كلما لك انت بعيد
توميلي بالاطواق
بى آيه تفتحى الأبواب
للجاك عديل ودنا
داير عينيك قراب وتبقيلي
دار ودنا
لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا
لله كم خطاب تتمنى حالو مني
يا بت بلا استغراب تكشحلى
جور وضنا
وأنا اجدر الخُطاب واكتر قلوبه عنا
راجيك تقولى حباب يا ......
ريدتى هاك كفنه
فالدنيا دون أحباب غيمة
الضباب دفنه .

حتى الفصول صابا الج
لا غيمه لا زفة هرع
والسنبر البفرح صفيره
فافغشانا أتقاطر رجع
وشجرنا من لفح السموم
غصنه الرقص رويان وقع
لا شابا لي ريحه دعاش
لا هش لي برقا" لمع
طوريتك في الطين مرمية
وطوريتك يابسة ومجدوعة
لا غيبتك كانت مرضية
ولا فوتك كانت مبلوعة
اللهب الضوا الليل قناديل
في عيون النجمة القطبية
والتعب المد ضراع النيل
سجادة فقرا مزاورية
سائلين عنك ويومياتي رحيل
لمواني المدن النفطية
وشقيش ما تقبل يا آبو الحيل
قلوبنا مواجعك متكية
وابعت لك شال الحب مرسال
تايهين في بحره مراكبية
وبكتب على صدر الموج آمال
أطفال عمال ومزارعية
كيف حال يا أبوي
كيف حال يا خال
بتمسى بيوتنا الكاكية
حزنانة بتبكى مآل الحال
والزمن الساقكم عيديه

ما طال ما بحرك فى مى
وتمرك مفدع بالجريد
شدرك أمد حد السمى
طينك معتق بالطمى
نبنيــك أكيد .. نبنيــك هوى
نبنيــك أيوه سوا .. سوا من وجديد .. نبنيـــك جديد
ياإيد أبوى على إيد أخوى على إيدى انا
على إيد و إيد
نجدع بعيد فى اللجة من راس ميضنه
حيكومة الفقر الدمار
الكضبن و الصهينة
واللى نقاص أيامنا كاس
اليالطيف سوس البحر نردم قفاهو حجر حجر
من ها الرصيف
الما قدر قدام سريعة الموج يقيف
الماانستر
الارزقية وناس مو00 يا
نسقيها كاس اسقنا يا
نوريها كيف عشق الحياة
سانانا فوق حجر القصاص
سوانا ناس ضرب البحر
جوانا احر من الرصاص
يا ضو حبيبين القسا
طول ما انت غرقان فى الأسى
تبت يدين ما ترمى ساس
ما تبنى مجدك من جديد
تفتح شبابيك الخلاص
تدخل نسيمات النشيد
بيت القصيد يستقبلا
مستقبله .. و الحاضر الماضى التليد
يابلدى يافردة جناحى التانى
وكت الناس تطير لى عالمه
وآ آفجعة الزول البيجيك
ما يلقى فيك غير الهجير ناسا تواتى مسالمه
كل البشاشات القبيل يلقاها ميته مسممه
والجاتا جاتا من الأرض ما جاتا من تال السما
ما أعتى غبنك يا ولد
وأعدل قضيتك وأعظمه
لاترجع السيف الجفير
والدنيا فايره مصادمه
من غير تجيب تار البلد ..
ريح العوارض تهزمه
تطرد مع ابليس الأخير دعاة الضلال
من جنتك يا آدما
تاكل من الشجر الحلال
يغشاك نعاس فى ضل رمى ..
تختاك هضاريب الصعب
كربة ليالى المظلمه
يانيل قبل خاطرك يطيب
أرضك تفزع باللهيب
تكشح تواريب الغضب .. صعب المراس
نوبه و زنوج و بجه و حلب
رطانه عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتله و كمنجه و مسطرين
و طبنجه فى خط التماس
نبنيك سوا
وأشد بأس

والله ألف شكر يا محمد حمزه يا فنان وانتا بتقرا لى راجل بى قامت محمد الحسن سالم حميد ويا ريت يا محمد لو تنزل الجابرية فى المنتدى لانو النص دا ما تتصور انا محتاج ليه فدر ايه

والله ياجريفاوى كتر خيرك على المرور وح افتش ليك القصيدة انشاءالله
ولك كل الاحترام